პროკურატურის ინფორმაციით, სასჯელაღსრულების დეპარტამენტის მე-8 დაწესებულების ყოფილ დირექტორს, ალექსანდრე მუხაძეს, იგივე “ქილერას”, პატიმრის წამების ფაქტზე 9 წლით თავისუფლების აღკვეთა მიესაჯა.
უწყების ცნობით, ირკვევა, რომ 2011 წლის მაისში მეგის ქარდავამ და ალექსანდრე მუხაძემ ადამიანს, რომელიც ნარკოტიკული ნივთიერების შეძენა-შენახვის ფაქტზე იყო დაკავებული, არარსებულ ტერორისტულ აქტებში მონაწილეობის აღიარება და მსგავს აქტებში მისი თანამონაწილეების დასახელება მოსთხოვეს, წინააღმდეგ შემთხვევაში კი გაუპატიურებით დაემუქრნენ.
“სასურველი ჩვენების მიცემაზე უარის მიღების შემდეგ, დაზარალებულს ერთ-ერთი პატიმრის მიმართ სექსუალურ ძალადობას აყურებინეს და დაემუქრნენ, რომ თუ სასურველ აღიარებით ჩვენებას არ მისცემდა, მასაც გააუპატიურებდნენ. ასევე, ალექსანდრე მუხაძემ პატიმარს არაერთხელ მიაყენა ფიზიკური შეურაცხყოფა.
ფიზიკური და ფსიქოლოგიური ზეწოლის შემდეგ დაზარალებულმა მეგის ქარდავას მითითებით, არარსებულ ტერორისტულ აქტებში მისი მონაწილეობის აღიარებითი ჩვენება დაწერა. ჩვენება ალექსანდრე მუხაძის და მეგის ქარდავასთვის საკმარისად ამომწურავი არ აღმოჩნდა, რის გამოც აიძულეს პატიმარი თავის დაწერილი ჩვენება შეეჭამა. შემდეგ კი დაზარალებულს სექსუალური ძალადობის ინსცენირება მოუწყვეს, რაც კამერით გადაიღეს.
სასჯელაღსრულების დაწესებულებაში პატიმარი არაერთხელ დაკითხეს, ასევე ხდებოდა მისი დაპირისპირება ე.წ. ტერაქტში თითქოსდა მხილებულ სხვა პირებთან. ერთ-ერთი დაპირისპირების დროს, მეგის ქარდავამ პატიმარს თავზე პისტოლეტი დაადო და დახვრეტის იმიტაცია მოახდინა”, – წერს პროკურატურა.
უწყება ირწმუნება, რომ წამებისა და სექსუალური ძალადობის ამსახველი კადრების გავრცელების და ფიზიკური ანგარიშსწორების გაგრძელების შიშით, დაკავებული აიძულეს ქარდავასა და მუხაძისათვის ხელსაყრელი აღიარებითი ჩვენებისთვის ხელი მოეწერა.
პროკურატურა ასევე აცხადებს, რომ დაწესებულების თანამშრომლების მხრიდან განხორციელებული წამების გამო დაზარალებულმა თვითმკვლელობაც სცადა.
კომენტარები