„ასეთი კინოსავით ამბები მარტო ქუჩაში ხდება“ – რას წერს აკა სინჯიკაშვილი უხილავ გმირ ქალზე?

ბლოგერი და საქველლმოქმედო პროექტების ავტორი, აკა სინჯიკაშვილი სოციალურ ქსელში უხილავი გმირი ქალის შესახებ წერს:

ხვალ 8 მარტია და უხილავ გმირ ქალზე მოგიყვებით ❤️

ასეთი კინოსავით ამბები მარტო ქუჩაში ხდება. უცხო თვალისთვის სრულიად შეუმჩნეველია და მე პირადად,  ამხელა სიყვარული და ერთგულება წიგნში და ფილმშიც არ მინახავს.

ლიანა ძალიან ლამაზია, 24 წლისაა. ქუჩაში გაიზარდა. შიზოფრენიით, პარანოიით და რამდენიმე ფსიქიური დაავადებით  მწვავე ავადმყოფია.

ვახო, ასევე ეტლში მჯდომ ავადმყოფ  დედასთან ერთად ცხოვრობდა თავშესაფარში, ლიანა იქ გაიცნო და დამეგობრდნენ. ვახო რამდენიმე წელია ეტლშია, არც მოძრაობა შეუძლია და არც ლაპარაკი.

ორი წლის წინ, ვახოს დედა თავშესაფრიდან პირდაპირ ქუჩაში  გამოუშვეს. შვილმა, ავადმყოფი დედა მარტო არ გამოუშვა და თვითონაც ქუჩაში გამოვიდა.

ლიანა მიხვდა, რომ ეტლში მჯდომი და ავადმყოფი დედა-შვილი, ქუჩაში მარტო ცოცხლები დიდხანს ვერ გაძლებდნენ, მიატოვა თავისი ოთახი  და თითქმის უცნობ ადამიანებს ისიც ქუჩაში გამოჰყვა.

სანამ ჩვენ ვიპოვეთ,  რამდენიმე თვე, პირდაპირ ცის ქვეშ, ბეტონზე ეძინათ.

ვახოს ეტლიც არ ჰქონდა და ლიანა ხელით ეჭიდებოდა და ისე ამოძრავებდა.

ლიანა უვლიდა დედას და შვილს. ლიანა მათხოვრობდა და ლუკმას უყოფდა, რომ გადაერჩინა, ლიანას დაჰყავდა ორივე ტუალეტში, ლიანა აფარებდა წვიმისას პარკებს. ლიანას იმედით იყვნენ ცოცხლები. თუ წარმოგიდგენიათ,  მართლა რა გაიარა, რომ ამათთვის სიცოცხლე შეენარჩუნებინა?!

სამ თვეში ვახოს დედა გარდაიცვალა და დარჩნენ ორნი.

ამ ამბის შემდეგ, ლიანა ასჯერ მეტად ზრუნავს ვახოზე. იცის, რომ მისი დატოვება, სასიკვდილოდ გაწირვის ტოლფასია.

ცივ ნიავს არ აკარებს მართლა და ვახოს ერთი სიტყვის თქმაც არ შეუძლია.

მარტო ცრემლი მოსდის ხოლმე თვალიდან და ასე გამოხატავს უზარმაზარ მადლიერებას. ლიანამ კი ჩახუტება იცის. ერთს ისე ჩაგეხუტება, მერე  მთელი ღამე გატირებს.

ამწამსაც, ვახო ეტლში ზის გაუნძრევლად, ლიანა ოთახში კივილით დარბის, უჩინარ არსებებს ჰაერში მუშტებს უქნევს და ლანძღავს. ფანჯარაში ვიღაცას ემუქრება და თან ვახოს ახსენებს – წამალი არ დაგილევიაო.

ჩვენ საჭმელს ვუტოვებთ, გარეთ  გამოვდივართ, გული ყელში გვაწვება, გვებღავლება, მაგრამ ჩვენც იმედიანად ვართ.

ნამდვილად ვიცით, რომ ლიანა არასდროს მიატოვებს ვახოს

იმიტომ, რომ ლიანა ნამდვილი გმირია. უხილავი გმირი ქალი – წერს აკა სინჯიკაშვილი.