2024 წელს საქართველოში იმპორტირებულია 16.8 მილიარდ აშშ დოლარზე მეტი ღირებულების პროდუქცია. იმპორტის უდიდესი ნაწილი თურქეთიდან, ამერიკიდან, რუსეთიდან, ჩინეთიდან და გერმანიიდან ხორციელდება.
იმპორტიორ ქვეყნებს შორის მეოთხე ადგილი უკავია ჩინეთს, მისი წილი მთლიან იმპორტში 9.6%-ს შეადგენს. საანგარიშო პერიოდში ჩინეთიდან 1.6 მილიარდი დოლარის პროდუქციის იმპორტი განხორციელდა, რაც წლიურად 24%-იან ზრდაზე მიანიშნებს. კერძოდ, 2023 წელს ჩინეთიდან საქართველოში 1.3 მილიარდი დოლარის პროდუქცია შემოვიდა.
ვის შემოაქვს ყველაზე დიდი რაოდენობით პროდუქცია ჩინეთიდან
“ბიზნესპრესნიუსი“ დაინტერესდა იმ კომპანიებით, რომლებსაც საქართველოში პროდუქცია ჩინეთიდან შემოაქვს.
შპს „ალტა“ 1998 წელს დარეგისტრირდა. მის დირექტორად სამეწარმეო რეესტრში კახა ჭოველიძე ფიქსირდება. კომპანიის 28.6%-ს – თეა კაკაბაძე, 7.39%-ს – ნანა კასრელიშვილი, 5%-ს – ლევანი ნიკოლაიშვილი ფლობენ. ამასთან „ალტას“ 47.8% ეკუთვნის შპს დაგეტა კაპიტალს, ამ უკანასკნელის მფლობელი კი საქართველო-აშშ-ს ორმაგი მოქალაქე ირაკლი კაკაბაძეა. დანარჩენ წილებს კი 11 პირი ინაწილებს.
შპს „ავტოტექნო“ სამეწარმეო რეესტრში 2016 წელს დარეგისტრირდა. კომპანიის წილების 100%-ის მფლობელი და დირექტორი მიხეილ ალხანიშვილია.
შპს „გორგია“ 2008 წელს არის რეგისტრირებული. წილებს სრულად გია გორგოშაძე ფლობს. კომპანიის დირექტორი კი ხვიჩა პაპუნიძეა.
2013 წელს დარეგისტრირებული შპს „ემტექნიკსის“ წილების მფლობელი კახა გაბრიჭიძეა, დირექტორის პოსტს კი ირინე გრძელიძე იკავებს.
შპს „იუ-ჯი-თის“ მთლიან წილებს შპს „იუ-ჯი-თი ჯგუფი“ ფლობს. „იუ-ჯი-თი ჯგუფი“ 2011 წელს არის რეგისტრირებული. კომპანიის წილების 85%-ს გრიგოლ ჭირაქაძე, 5%-ს გურამ ხოჯანაშვილი, 5%-ს გიორგი მაისურაძე და ასევე 5%-ს ერმილე სულაძე ინაწილებენ.
შპს „კორეან ელექტრონიქს“ 2017 წელს არის რეგისტრირებული. კომპანიის დირექტორი და 100%-იანი წილების მფლობელი გიორგი ქიძინიძეა.
შპს „მაგთიკომი“ რეესტრში 1996 წელს დარეგისტრირდა. წილების 51%-ს აშშ-ში დაფუძნებული „ინტერნეიშენელ ტელსელ სელულარ“, ხოლო 49%-ს ასევე ამერიკაში დაფუძნებული „ტელსელ უაიერლეს კომპანი“ ინაწილებენ.
შპს „ნოვა“ 2006 წელს დარეგისტრირდა. კომპანიის წილებს 5 პირი ინაწილებს, თითოეული წილების 20-20%-ს ფლობს. უფრო კონკრეტულად, კომპანიის მეწილეები არიან: ზვიად აბულაძე, ჯემალ ბოლქვაძე, ემზარ ირემაძე, ჯემალ ანთაძე და რამაზ ირემაძე.
შპს „ომეგა“ 1996 წელს არის რეგისტრირებული. კომპანიის წილების 40%-ს რუსეთისა და საქართველოს ორმაგი მოქალაქეობის მქონე თამარა გაბრიელაშვილი ფლობს, წილების 50% გრიგორი გუდავაძის ხოლო 10% ნინო გაბუნიას მფლობელობაში. გაბუნია იკავებს დირექტორის პოზიციასაც.
შპს „ჯი არ სი“ რეესტრში 2003 წელს დარეგისტრირდა. წილების უდიდეს ნაწილს, 40%-ს გიორგი აღდგომელაშვილი ფლობს. ამასთანავე, წილების 30%-ის მფლობელია მერაბ ნიქაბაძე, 15-15%-ს კი დავით ნიქაბაძე და გიორგი ნიქაბაძე ფლობენ.
კომენტარები