„ჰოდა, რა გაგიკვირდათ და რაზე აღშფოთდით? რას ელოდით?“ – დავით ზურაბიშვილი

არაფერი ამ კაცს არ უთქვამს ისეთი, რასაც ყოველდღე არ ლაპარაკობენ შალვა რამიშვილი თავისი ბაჩო და გურით, გოგა ხაინდრავა, ღია აბაშიძე, ზაზა შათირიშვილი, ედიშერ გვენეტაძე და ა. შ., მოკლედ, მთელი სახელისუფლო პროპაგანდა. საქართველოს რომ ტყუილად ერჩიან დასავლეთიდან, ეკონომიკა რომ აყვავდა, ბიძინა რომ ჭკვიანურ პოლიტიკას ატარებს რუსეთის მიმართ და ამით მშვიდობას უზრუნველყოფს, დემოკრატია რომ გვაქვს და ვიღაცას თუ გამჭვირვალობა არ უნდა, ეს რომ ცუდია, სააკაშვილის რეჟიმის რევანშის საფრთხე რომ არსებობს, სახელმწიფო გადატრიალებას თუ აწყობს ოპოზიცია ის რომ დასასჯელია, ისევე როგორც პოლიციელებზე თავდასხმა და ა. შ და ა. შ., ეს ყველაფერი პირველად გაიგო ვინმემ? დავიჯერო ხელისუფლების მომხრე არ გყავთ სადმე ნაცნობ-მეგობრებში და არ გილაპარაკიათ მასთან?

ჰოდა, რა გაგიკვირდათ და რაზე აღშფოთდით? რას ელოდით? პუწინ ნაშ პრეზიდენტო, იმას იტყოდა, ევროპას რუსეთი ჯობია და ნეტა ხვალ ჩელიაბინსკში გავიღვიძოთო, თუ რას?

რუხაძემ რაც ილაპარაკა, ეს ოპოზიციური აუდიტორიისთვისაა სიახლე, თორემ გადართეთ იმედზე, რომელსაც ის ვითომ არ უყურებს და ნახავთ, რომ იგივე ნარატივ-მესიჯები ნიაღვარივით მოედინება ყოველდღე. მოედინება ყოველგვარი წინაღობის გარეშე, რადგან მთელი სახელისუფლო პროპაგანდა დიდწილად დაფუძნებულია ცალმხრივობასა და პოლარიზაციაზე,

სხვა თემაა, რომ მარტო ხელისუფლება კი არაა მონოლოგის რეჟიმში, არამედ ოპოზიციური ფლანგი და ოპოზიციური მედიის მეინსტრიმიც, რაც ცალსახად არის ძალიან ცუდი, რადგან ამ შემთხვევაში პოლარიზაცია გარდუვალია და პოლარიზაციის დროს კი უპირატეს მდგომარეობაში ისაა, ვისაც მეტი ფინანსური და მატერიალური რესურსი აქვს. მარტივად რომ ვთქვა, პოლარიზაცია ხელისუფლებისთვის უფრო ხელსაყრელია. ბოლო-ბოლო ის ერთია და შესაბამისად უფრო მიზანმიმართული, ოპოზიცური აზრი კი ბევრი, სხვადასხვანაირი და შესაბამისად გაბნეული.

ეს ვითარება არის აუცილებლად გამოსასწორებელი და ამისთვის საჭიროა დებატების რეჟიმი მაქსიმალურად ყველგან და ყველა ფორმატში. პირადად მე ვფიქრობ, ქვეყანაში ისეთი პოლიტიკური სიტუაციაა, იმდენად ცხადია სადაა სიმართლე და სად ტყუილი, რომ ნებისმიერი ფორმის დებატი ხელისუფლებისთვის წამგებიანია. ამიტომ ნუ დავტოვებთ ხელისუფლებას მარტო, რადგან ის მარტო თავისთავთან კი არ რჩება, არამედ ხალხთან.“