“ერთიანობა ნაციონალური მოძრაობის” ლიდერი თინა ბოკუჩავა ამბობს, რომ პარტია პრეზიდენტთან კონსულტაციებისთვის მზად არის. ამასთან, ოპოზიციონერი ლიდერი მიიჩნევს, რომ მომავალი მთავრობის დაკომპლექტებაზე საუბარი ნაადრევია, რადგან ამაზე ჯერ პოლიტიკურ სპექტრში საუბარი არ ყოფილა.
გვაქვს შემოთავაზება პრეზიდენტ ზურაბიშვილის მხრიდან, რომ გავმართოთ კონსულტაციები. ბუნებრივია, ჩვენ მზად ვართ ამგვარი კონსულტაციებისთვის, ჩვენ ხელმომწერი ვართ ქართული ქარტიის, რომელიც არის ერთგვარი გზამკვლევი საქართველოსთვის ევროკავშირში გაწევრიანების პროცესში, ამიტომ, თავისთავად, ეს პროცესი ძალიან მნიშვნელოვნად მიგვაჩნია, თუმცა ვფიქრობ, ჯერ საუბარი მთავრობის დაკომპლექტებაზე ამ ეტაპზე, როდესაც ეს განხილვის თემა პოლიტიკურ სპექტრში არ ყოფილა, იქნება ნაადრევი, – ამბობს ბოკუჩავა.
საქართველოს პრეზიდენტი ოპოზიციასთან კონსულტაციების ახალ სერიას იწყებს. არჩევნებამდე 21 დღით ადრე, პრეზიდენტს გადაწყვეტილი აქვს ქართულ ქარტიაზე ხელმომწერ პარტიებს გააცნოს და შესთავაზოს მის მიერ შერჩეული პრემიერობის კანდიდატი, რომელიც ტექნიკური მთავრობის შექმნის შემთხვევაში, მთავრობას სათავეში ჩაუდგება.
კომენტარები