„მხარს ვუჭერთ 3 ტელეკომპანიის გადაწყვეტილებას, შეეწინააღმდეგონ “ოცნების” არაეთიკურ წინაასარჩვენო კამპანიას“ – ეთიკის ქარტია

ჟურნალისტური ეთიკის ქარტია მხარს უჭერს სამი კრიტიკული არხის გადაწყვეტილებას, არ განათავსონ ეთერში “ქართული ოცნების” არაეთიკური წინსაარჩევნო ვიდეორგოლები. ამის შესახებ მათ მიერ გამოქვეყნებულ განცხადებაშია ნათქვამი.

ჟურნალისტური ეთიკის ქარტია მიიჩნევს, რომ აღნიშნული ვიდეორგოლი კრემლის გზავნილებს იმეორებს და შეურაცხყოფს როგორც უკრაინელი, ასევე ქართველი ხალხის ღირსებას. ამასთან, ორგანიზაცია კომუნნიკაციების ეროვნულ კომისიას მოუწოდებს, არ დაავალდებულონ მედიასაშუალებები, ეთერში მმართველი პარტიის ვიდეორგოლი განათავსონ.

ჟურნალისტური ეთიკის ქარტია მხარს უჭერს ტელეკომპანიების „ფორმულა“, „მთავარი არხი“ და „ტვ პირველი“ გადაწყვეტილებას, შეეწინააღმდეგონ “ქართული ოცნების” არაეთიკურ წინასაარჩევნო კამპანიას და საქართველოს კომუნიკაციების ეროვნულ კომისიას მოუწოდებს, არ დაავალდებულოს ისინი ეთერში განათავსონ მმართველი პარტიის საარჩევნო ვიდეორგოლი, რომელიც კრემლის გზავნილებს იმეორებს, შეურაცხყოფს როგორც უკრაინელი, ისე ქართველი ხალხის ღირსებას და ძირს უთხრის ამ ორ ერს შორის ისტორიულად ჩამოყალიბებულ მეგობრობას. ქუჩაში გამოფენილმა მსგავსი შინაარსის საარჩევნო ბანერებმა ტკივილი მიაყენა უკრაინულ ხალხს და ქართული საზოგადოების სრულიად სამართლიანი გულისწყრომა გამოიწვია, – ნათქვამია განცხადებაში.