“ბავშვებს ცემენ… რატომ კლავ?”, “რუსული კანონი მიუღებელია” – ოჯახის სიწმინდის დღეზე მისული მოქალაქეები

ოჯახის სიწმინდის დღეზე მისული მოქალაქეები ხელისუფლებას მოუწოდებენ შეწყვიტონ ახალგაზრდებზე ძალადობა და მოუსმინოს იმ ახალგაზრდებს, ვინც რუსულ კანონს აპროტესტებს.

მსვლელობაში მონაწილეების ნაწილი აკრიტიკებს ხელისუფლებას ახალგაზრდებზე სასტიკი ანგარიშსწორების გამო და მოუწოდებს მთავრობას, რომ ანტირუსული აქციის მონაწილეების მოსაზრებები გაითვალისწინოს.

ტვ პირველი აქვეყნებს აქციის მონაწილეების ინტერვიუებს:

რუსული კანონის დამტკიცება არ არის მისაღები, რა თქმა უნდა. ახალგაზრდები ამაზე იბრძვიან და ღმერთმა ხელი მოუმართოთ. ძალადობა მიდის და ბავშვებს სცემენ და ბავშვებს რა დღეში აყენებენ ძალიან ცუდი დასანახი და აღსაქმელია. მიუღებელია ასეთი რამ, არ შეიძლება, თავისუფლება, დემოკრატია თუ არ დააცალე, იმ ბავშვმა თქვას რაღაც, რატომ ეძალადები და რატომ კლავ. ახალგაზრდებს უნდა დავუთმოთ, მოუსმინონ მათ, ახალგაზრდობას გაუწიონ ანგარიში,“ – ამბობს აქციის ერთ-ერთი მონაწილე.

მთავრობამ უნდა დაიხიოს და ახალგაზრდების გულის სათქმელი გაითვალისწინონ. ვფიქრობ, რომ კანონი რუსულია, არ მომწონს. ბევრს არ მოსწონს, ვნახოთ. ახალგაზრდებს უნდა მოვუსმინოთ, მათი სათქმელი უნდა გავითვალისწინოთ, მთავრობამ უნდა გაითვალისწინოს. სხვა გზა არ არის,“ – ამბობს აქციის ერთ-ერთი მონაწილე.

მე იმის მიუხედავად, რომ აქ ვდგავარ, ეს არ ნიშნავს, რომ მე არ ვარ ევროპული მომავლის მომხრე. ამ შემთხვევაში, მე იმ ახალგაზრდების (აზრს) ვიზიარებ, მხარში ვუდგავარ ამ მხრივ, რომ აუცილებლად ევროპული მომავალი საქართველოსთვის, იმიტომ, რომ ჩვენ ვიცით, 230 წელზე მეტი გავიდა, რაც მოგვიტანა გეორგიევსკის ტრაქტატმა და სადამდე მიიყვანა საქართველო და ჩვენ უნდა გამოვიდეთ ამ რუტინიდან,“ – ამბობს აქციის ერთ-ერთი მონაწილე.