“ეხო კავკაზა” რუსეთის სტატისტიკის სამსახურის მონაცემებზე დაყრდნობით ავრცელებს ინფორმაციას, რომ რუსეთში ბენზინსა და დიზელის საწვავის ყოველკვირეული წარმოება მცირდება უკრაინული დრონების თავდასხმების გამო.
სტატისტიკის მიხედვით, 18-24 მარტის კვირის განმავლობაში, რუსულმა გადამამუშავებელმა ქარხნებმა აწარმოეს 754,6 ათასი ტონა ბენზინი და 1,648 მილიონი ტონა დიზელი. წინა წლის ანალოგიურ პერიოდში – 880 ათასი ტონა ბენზინი და 1,770 მილიონი ტონა დიზელის საწვავი.
ამრიგად, რუსეთში ბენზინის წარმოება მარტის ბოლოს წლიური თვალსაზრისით შემცირდა 14%-ით, ხოლო დიზელის საწვავის – 7%-ით.
გასულ კვირას “Новая газета Европа” წერდა, რომ მარტის შუა რიცხვებისთვის უკრაინის შეიარაღებულმა ძალებმა შეძლეს მწყობრიდან გამოეყვანათ საავტომობილო საწვავის რუსული წარმოების დაახლოებით მეექვსედი (16%).
მარტში თავდასხმა იყო არაერთ ქარხანაზე, მათ შორის “როსნეფტისა” და “ლუკოილის” ქარხნებზე. ორივე შედის რუსეთის 10 უმსხვილეს ნავთობგადამამუშავებელ ქარხანაში და მოსკოვს ბენზინით ამარაგებს.
კომენტარები