მწერალი, ალეკო შუღლაძე:
უაზრო „ბოევიკის“ ყურება ხომ დიდი ტანჯვაა, მისი არ ყურება და გვერდითა ოთახიდან მოსმენა, ასჯერ მეტი წამებაა. ორი საათი და ოცდაათი წუთი სულ რაღაც ფეთქდება, მიდის ჩხუბისა და ჭიდაობის ხმები, ღრიანცელი, ჭინთვები, მტლაშა-მტლუში, უჭკუო შეძახილები…ასევე საშინელებაა, როცა ვინმე ვინმეს ეძახის: „მამა… მამა… მამა…“და ეს არ მთავრდება. გვერდიდან არ ჩანს, რა *ლე ეტაკა მამას, შვილს რომ არ პასუხობს, ეს გამხმოვანებელიც რომ არ ჩერდება: „მამა… მამა… მამა…“ერთხელ „მამას“ – 28 დაძახება დავთვალე.
ახლა წივილი. ვიღაცას მისდევენ, თუ უკვე დაიჭირეს, თუ რას უშვრებიან, არ ვიცით, ის კი წივის. ეგეთი რეჟისორი უნდა გააგდო საერთოდ, ვინც ამდენ წივილს ტენის სცენაში.„მიშველეთ, მიშველეთ, მიშველეთ, მიშველეთ…“ ვერ ხვდები, რომ არავინ მოდის საშველად, მოკეტე რა!აუტანელია ასეთი კომბინაცია: „მიშველეთ… ჯეკ… მიშველეთ… ჯეკ… მიშველეთ… ჯეკ… ჯეკ… ჯეკ, ვაიმე, ჯეკ… ვაიმე, ჯეკ… “ჯეკ შენა და ნიკო მუნჯის!მოჩვენება-გოგონა-თოჯინას რომ მიჩვენებ, შეღებილს, ეშვებით და თან რომ წივის, ეგეთი რეჟისორი საერთოდ უნდა გააგდო.„არ მომეკარო, გესმის, არ მომეკარო! არ მომეკარო, გესმის, არ მომეკარო! მამა… მიშველეთ… მამა! არ მომეკარო, გესმის, არ მომეკარო… ხელი გამიშვი… ხელი გამიშვი… ხელი გამიშვი! მამა! მიშველეთ! არ მომეკარო, გესმის, არ მომეკარო!“ძალიან ცუდად ჩანს სიცილის სცენები. მაგალითად, მთავარ გმირს რომ დასცინიან და ეს კი ცუდადაა. კარგი, რამდენ ხანს უნდა იცინონ იმათმა? გაიცინეს, მორჩა. რა ისეთი სასაცილო რამ შეიძლება მოხდეს, რომ ადამიანები, თუნდაც ბოროტები, 1 წუთი ყალბად იცინოდნენ. ეს გარეთ გარბის, მირბის და სიცილი გრძელდება კიდევ ორი წუთი, ხალხი იცინის და ერთმანეთს უყურებენ და სულ იციან, რა *ლეები ეტაკათ, ვერ მიხვდები.ანდა, „გაშეშდით“, დაიყვირა რეჟისორმა და გაშეშდა მასოვკა-ფონი, წინ ტრაგედიაა, უკანა სტატისტების ბრიგადაა გაშეშებული, გამოვდივართ, ვშორდებით ნელ-ნელა და მასოვკა სულ გაშეშებულია, ზოგიერთს ცისკენ აღუპყრია ხელები და ასეა გაშეშებული… ან პირჯვარი გადაიწერე, ან ვინმე მუხლებზე დაეცეს, ან რაღაც საერთო მოძრაობა წავიდეს. არა, გაიყინა სასტავი. ეგეთი ფილმების კონკურსი უნდა გაკეთდეს სადმე, მე ვიქნები ჟიურის თავმჯდომარე, გამარჯვებული ის იქნება, ვინც ბოლოზე გავა.
კომენტარები