თბილისის საკრებულოს კომისიის თავმჯდომარე კახაბერ ლაბუჩიძემ 2024 წლის თანამდებობის პირთა ქონებრივი მდგომარეობის დეკლარაციაში საკუთარი უძრავი ქონება და ხელფასი არ მიუთითა.
“საერთაშორისო გამჭვირვალობა საქართველო” წერს, რომ კახაბერ ლაბუჩიძე ფლობს ორ უძრავ ქონებას, რომელთაგან არც ერთს არ უთითებს დეკლარაციაში:
- ქ. თბილისი, სულხან ცინცაძის ქუჩა – 115.58 კვ.მ ბინა.
- ბორჯომის მუნიციპალიტეტი, დაბა ბაკურიანი, დიდველი – 36.40 კვ.მ ბინა.
ორგანიზაციის ცნობით, უძრავი ქონება ლაბუჩიძემ არც 2023 წელს დაადეკლარირა. გარდა ამისა, მან დეკლარაციაში არ ასახა თბილისის საკრებულოს კომისიის თავმჯდომარედ თანამდებობაზე ყოფნის პერიოდში მის მიერ წლის განმავლობაში მიღებული შრომის ანაზღაურება (ხელფასი).
განცხადებაში აღნიშნულია ისიც, რომ საჯარო სამსახურის ბიურომ 2022 წელს უკვე დააჯარიმა კახაბერ ლაბუჩიძე დეკლარაციის არასრულად შევსების გამო.
“საერთაშორისო გამჭვირვალობა – საქართველო” მიმართავს სსიპ ანტიკორუფციულ ბიუროს შეისწავლოს კახაბერ ლაბუჩიძის დეკლარაციაში გამოვლენილი დარღვევები და მოახდინოს შესაბამისი რეაგირება.
კომენტარები