2 წლის ანიტა ფაცაციას მდგომარების შესახებ ოჯახის ახლობელი მარიკა ხუციშვილი ჯგუფში „ატინასთვის“ უახლეს ინფორმაციას აქვეყნებს და წერს, რომ ბავშვის მდგომარეობა უცვლელია და მკურნალობა მაქსიმალურად მიმართულია ინფექციის დასაძლევად.
„ანიტას მდგომარეობა უცვლელია. მკურნალობა მაქსიმალურად მიმართულია ინფექციის დასაძლევად.
როგორც უკვე გითხარით, ექიმ ბალაკრიშნანის თქმით, ისიც, რომ არ აღინიშნება მდგომარეობის უკუსვლა – კარგი ამბავია.
ძალიან ბევრმა მოგვწერეთ კითხვით სანდოა თუ არა ინდოელი ექიმების მკურნალობის მეთოდი.
შეგახსენებთ, რომ ინდოეთი ერთადერთი ქვეყანაა, რომელმაც მიიღო ანიტა, რისთვისაც მათი ძალიან მადლიერები ვართ, ხოლო ექიმი ბალაკრიშნანი კი ერთ-ერთი საუკეთესო ბავშვთა კარდიოქირურგია მსოფლიოში.
გარდა ამისა, ჩვენ ყოველდღიური კონტაქტი გვაქვს ანიტას მკურნალ ექიმთან დავით ბერიშვილთან, რომელიც საქართველოს საუკეთესო ბავშვთა კარდიოქირურგია, ანიტასავადმყოფობის პირველივე დღეებიდან აქტიურად ჩართულია და ყველა სახის დახმარებას გვიწევს დისტანციურად. მისი შეფასებით ანიტას მკურნალობა ამ ეტაპზე სრულიად სწორად მიმდინარეობს.
გვინდა აღვნიშნოთ, რომ დავით ბერიშვილმა თბილისში ანიტას გასინჯვისთანავე, გარდა დიაგნოზისა, ყველა სწორი მიმართულება მოგვცა, სწორედ მან ახსენა პირველმა ინდოეთში გამგზავრება და დღემდე, ყველა სასარგებლო რჩევას ამ ადამიანისგან და მისი ბავშვთა კარდიოქირურგების არაჩვეულებრივი გუნდისგან ვიღებთ.
კიდევ ერთხელ გავიმეორებთ, რომ ქართველები ძალიან ძლიერი და კარგი ერი ვართ!
ერთად ყველაფერს შევძლებთ“, – წერს მარიკა ხუციშვილი.
ცნობისთვის, მას შემდეგ, რაც ავსტრიის შემდეგ ანიტას ოპერაციაზე იტალიის კლინიკამაც უარი თქვა, ბავშვის ოპერაციის ჩატარებაზე პასუხისმგებლობა კი ვერც ბელარუსმა აიღო, ანიტას ოჯახმა შეთავაზება ინდოეთიდან მიიღო.
რისკების მიუხედავად, 2 წლის ანიტა ფაცაცია ინდოეთში მშვიდობით ჩაფრინდა და მკურნალობას ინდოეთის კლინიკაში განაგრძობს.
კომენტარები