დღემდე ვერ ათქმევინა ვერავინ სალომე ზურაბიშვილს, რომ საქართველო იმსახურებს კანდიდატის სტატუსს. რა გვინდა ასეთი ადამიანის ღონისძიებაზე?! – ამის შესახებ პარტია „ქართული ოცნების“ თავმჯდომარემ, საპარლამენტო უმრავლესობის ლიდერმა ირაკლი კობახიძემ ჟურნალისტებს განუცხადა.
მისი თქმით, „ქართულ ოცნებას“ „ნაციონალური მოძრაობის“ პრეზიდენტის ღონისძიებაზე არაფერი ესაქმება.
„ნაცმოძრაობის“ პრეზიდენტის ღონისძიებაზე ჩვენ [„ქართულ ოცნებას“] არაფერი გვესაქმება, მითუმეტეს რომ ის [სალომე ზურაბიშვილი] აგრძელებს კონსტიტუციის უხეშ დარღვევას. ასეთი ადამიანის ღონისძიებებზე, რა თქმა უნდა არ და ვერ მივალთ, ეს არ არის ჩვენი საქმე მისი პოზიციიდან გამომდინარე. გარდა ამისა, შეგახსენებთ, რომ მთელი ამ პერიოდის განმავლობაში, სალომე ზურაბიშვილი ახორციელებდა საბოტაჟს სწორედ კანდიდატის სტატუსის წინააღმდეგ. დღემდე ვერ ათქმევინა ვერავინ სალომე ზურაბიშვილს, რომ საქართველო იმსახურებს კანდიდატის სტატუსს. რა გვინდა ასეთი ადამიანის ღონისძიებაზე?!“ – აღნიშნა კობახიძემ.
13 დეკემბერს, ევროკავშირის ისტორიულ გადაწყვეტილებამდე ორი დღით ადრე, საქართველოს პრეზიდენტი ორბელიანების სასახლეში ეპატიჟება ყველა ხელისუფლების მოქმედ და ყოფილ მაღალჩინოსანს. მათ შორის “ქართული ოცნების” ლიდერებს, ყოფილ და მოქმედ პრემიერებს და საგარეო საქმეთა მინისტრებს. ღონისძიებაში მონაწილეობას ევროკავშირის 27-ვე სახელმწიფოს ელჩი მიიღებს.
კომენტარები