,, პარტიას, რომელსაც ჰყავს კობახიძე, მდინარაძე, ოხანაშვილი და მათიკაშვილი, იმას ხმა როგორ უნდა მისცენ?” – ეკა ბესელია

ლევან ჯავახიშვილი

„ალიას“ ესაუბრება პარტია „სამართლიანობის“თავმჯდომარე, ეკა ბესელია.

–ირაკლი კობახიძე, მამუკა მდინარაძე და „ქართული ოცნების“ სხვა ლიდერები გამოვიდნენ და განაცხადეს, საარჩევნო ბარიერის 2%–მდე დაწევას ვინც ითხოვს, სერიოზული პარტიები დაპოლიტიკოსები არ არიან, 5%–ს თუ ვერ გადალახავენ, საერთოდ რა უნდათ პოლიტიკაშიო. მათ შორის, თქვენს პარტიასაც გულისხმობენ. მკითხველს რომ აუხსნათ, რა აზრი აქვს ბარიერის დაწევას და რას მოუტანს ეს ამ ეტაპზე ქართულ დემოკრატიას?

–ძალიან ბევრ ქვეყანაშია დაბალი ბარიერი, მით უმეტეს, ჩვენნაირ ქვეყნებში, სადაც ვერ ხერხდება სამართლიანი არჩევნების ჩატარება. არჩევნების მიმართ ნდობა ძალიან დაბალია და გაყალბების ბერკეტები კი უამრავი. განსაკუთრებით ახლა, როდესაც კოალიციური მთავრობისთვის ვემზადებით, ბუნებრივია, სასიცოცხლოდ მნიშვნელოვნია, რომ პარლამენტში იყოს რამდენიმე ოპოზიციური პარტია. თუ 2%–იანი ბარიერი იქნება, „ქართული ოცნება“ დაკარგავს ბერკეტს, თავად წაიღონ მანდატები. 5%–იანი ბარიერი იმიტომ აწყობთ, რომ ბარიერ გადაულახავი პარტიების მიღებულ ხმებს, ამ ორ, სამ და ოთხ პროცენტს თავად მიიწერენ და მეტ მანდატს მიიღებენ. ამის გამო არ უნდათ ბარიერის დაწევა, ეს გასაგებია, მაგრამ „ქართულმა ოცნებამ“ ხელი მოაწერა შარლ მიშელის შეთანხმებას, სადაც სწერია, რომ 2024 წლის არჩევნები უნდა ჩატარდეს 2%–იანი ბარიერის პირობებში. ეს ცვლილება პარლამენტმა პირველი მოსმენით მიიღო. უთავმოყვარეო ირაკლი კობახიძე ამბობდა, რომ მოგვცემენ თუ არა ევროკანდიდატის სტატუსს, ჩვენ 2%–იან ბარიერს დავაწესებთო. ახლა გამოდის და იძახის, ეს მაშინ ვთქვი, ახლა სხვა აზრზე ვარ და ის ნათქვამი აღარ არის ძალაშიო. ისეთი არასაიმედო პარტნიორის სახე ჩამოიყალიბა „ქართულმა ოცნებამ“, რომ მას არავინ უნდა ენდოს. ამომრჩეველმა უნდა შეხედოს ამას. შენ როდესაც გყავს მატყუარა წარმომადგენლები ამ პარტიაში, როგორ უნდა მისცე მას ხმა? პარტიას, რომელსაც ჰყავს კობახიძე, მდინარაძე, ოხანაშვილი და მათიკაშვილი, იმას ხმა როგორ უნდა მისცენ? ბიძინა ივანიშვილი საერთოდ არ ჩანს მაგ პარტიაში, თავიანთ წარმოსახვებში აძლევენ ხმას ივანიშვილს? ამ ხალხს ხმა როგორ უნდა მისცენ, ჩემთვის წარმოუდგენელი ამბავია.

–2%–მდე რომ ჩამოსწიონ ბარიერი, ასეთ შემთხვევაში რა გათვლები გაქვთ ოპოზიციური პარტიის ლიდერებს, „ქართული ოცნება“ ხელისუფლებას ვეღარ ინარჩუნებს და კოალიციური მთავრობა შეიქმნება?

–ჩემი მოლოდინია, რომ ხელისუფლება უნდა შეიცვალოს და შეიცვლება 2024 წელს. ახლა მთავარი ამოცანაა, ოპოზიციამ მოახერხოს და რამდენიმე არჩევანი შესთავაზოს ამომრჩეველს. უნდა იყოს ორი, სამი და მაქსიმუმ ოთხი მსხვილი გაერთიანება. შესაბამისად, საჭირო იქნება გარკვეული გადაჯგუფებები. მთავარი ამოცანაა, მოხდეს კოალიციური ტიპის დაჯგუფებების შექნმა, რაც კოალიციური ხელისუფლების შექმნის გარანტია იქნება.