დღეს სოხუმში აფხაზეთის დე ფაქტო რესპუბლიკის პრეზიდენტად არჩეული ასლან ბჟანიას ინაუგურაცია გაიმართება. COVID-19-ის პანდემიის გამო დაწესებული კარანტინის პირობებში, ბჟანია ე.წ. პრეზიდენტის ფიცს ადმინისტრაციის შენობის დარბაზში დადებს.
ცერემონიას პირველად არ დაესწრებიან უცხოელი სტუმრები, ამის შესახებ სააგენტო tass-ი იტყობინება.
დარბაზში იქნებიან აფხაზეთის დე ფაქტო რესპუბლიკის პარლამენტის და მთავრობის წევრები, საკონსტიტუციო და უზენაესი სასამართლოს ხელმძღვანელები, გენერალური პროკურორი, რუსეთის, „სამხრეთ ოსეთისა“ და დნესტრისპირეთის ელჩები, ასევე სასულიერო პირები.
დე ფაქტო პრეზიდენტის ადმინისტრაციაში აცხადებენ, რომ დარბაზში 60 კაცზე მეტი არ შეიკრიბება და დაცული იქნება უსაფრთხოების ნორმები.
„პრეზიდენტის ფიცის დადების ცერემონია პრეზიდენტის ადმინისტრაციის ასამბლეის დარბაზში, უცხოელი სტუმრების მონაწილეობის გარეშე ჩაივლის, რადგან ღონისძიება ტარდება კორონავირუსის პანდემიის ფონზე. ინაუგურაციაზე წარმოდგენილნი იქნებიან პარლამენტის დეპუტატები, უზენაესი სასამართლოს თავმჯდომარე, ცენტრალური საარჩევნო კომისიის თავმჯდომარე, გენერალური პროკურორი, რუსეთის, სამხრეთ ოსეთისა და დნესტრისპირეთის ელჩები აფხაზეთში, აღმასრულებელი ხელისუფლების წევრები და აფხაზეთის მართლმადიდებელი ეკლესიის და რესპუბლიკი მუსლიმთა ადმინისტრაციის წარმომადგენლები“,- ნათქვამია დე ფაქტო პრეზიდენტის ადმინისტრაციის მიერ გავრცელებულ განცხადებაში.
ცნობისთვის, ასლან ბჟანიამ ე.წ. საპრეზიდენტო არჩევნებში 56.6%-ით გაიმარჯვა. ბჟანიამ 53 741 ამომრჩევლის ხმა მოიპოვა.
დე ფაქტო პრეზიდენტი, გავრცელებული ინფორმაციით, ფიცს აფხაზურ ენაზე დადებს.
კომენტარები