მესაზღვრეს, რომელმაც ვაშლოვანის ნაკრძალში ტურისტების მისამართით ისროლა, ბრალი წარუდგინეს. შინაგან საქმეთა სამინისტროს თანამშრომელს ძალადობით და იარაღის გამოყენებით სამსახურებრივი უფლებამოსილების გადამეტებას ედავებიან.
სავარაუდოდ დღეს თელავის რაიონულ სასამართლოში გაიმართება მესაზღვრის საქმეზე სასამართლო პროცესი. ცნობილია ფაქტი, რომ შსს-ს სასაზღვრო პოლიციის თანამშრომელი ნასვამ მდგომარეობაში იმყოფებოდა.
“უცხო ქვეყნის ორი მოქალაქე, სხვა ტურისტებთან ერთად საქართველოს სასაზღვრო პოლიციის მიჯნისყურის სასაზღვრო პოსტის მიმდებარედ ვაშლოვანის სახელმწიფო ნაკრძალში იმყოფებოდა. გვიან ღამით, ბანაკის ტერიტორიაზე ნასვამ მდგომარეობაში მყოფი შსს-ს სასაზღვრო პოლიციის თანამშრომელი მივიდა, რომელმაც სამსახურებრივი ავტომატური ცეცხლსასროლი იარაღიდან ერთი უმისამართო გასროლა განახორციელა. მათ პირადობის დამადასტურებელი დოკუმენტის წარდგენა მოსთხოვა, რის შემდეგაც ორივეს ხელბორკილი დაადო. დაკავებულს ბრალდება ძალადობით და იარაღის გამოყენებით სამსახურებრივი უფლებამოსილების გადამეტების ფაქტზე წარედგინა, რაც სასჯელის სახედ და ზომად 5-დან 8 წლამდე თავისუფლების აღკვეთას ითვალისწინებს” – ამბობს საქართველოს პროკურატურის წარმომადგენელი.
შეგახსენებთ, რომ ვაშლოვანის სახელმწიფო ნაკრძალში ნასვამ მდგომარეობაში მყოფმა შსს-ს სასაზღვრო პოლიციის თანამშრომელმა კარვებში მყოფ ტურისტებს ესროლა, რომელთა შორის უცხო ქვეყნის მოქალაქეებიც იყვნენ.
კომენტარები