ლაზარე გრიგორიადისის სასამართლო პროცესი, რომელიც დღეს, 8 მაისს, თბილისის საქალაქო სასამართლოში უნდა გამართულიყო, გადაიდო.
როგორც ლაზარე გრიგორიადისის ადვოკატი, თათია მანიჟაშვილი ამბობს, მიზეზი დაცვის მხარის სააპელაციოსთვის მიმართვაა, რომლისგანაც იმ მტკიცებულების დაშვებას ითხოვს, რომელიც საქალაქო სასამართლომ დაუშვებლად ცნო.
ადვოკატის თქმით, სააპელაციო სასამართლოს პარასკევს, 5 მაისს, მიმართეს და გადაწყვეტილება 5 დღეში უნდა მიიღოს.
შესაბამისად, მისი თქმით, ლაზარეს პროცესის ჩანიშვნაც სააპელაციოს მიერ გადაწყვეტილების მიღებაზეა დამოკიდებული. ადვოკატის თქმით, სწორედ ამის შემდეგ გადაწყდება, რომელ მოსამართლეს დაეწერება გრიგორიადისის საქმე.
“წინასასამართლო სხდომაზე სასამართლომ განიხილა მტკიცებულებების დაუშვებლობა/დასაშვებობის საკითხთან დაკავშირებით. მხარეებმა დავაყენეთ, რომელი მტკიცებულება იყო ბრალდების დასაშვები და რომელი არა. თუმცა, ბრალდების მხარემ მოითხოვა [ლაზარეს] ერთ-ერთი ადვოკატის, დიმიტრი ნოზაძის დაუშვებლად ცნობა, სასამართლომ დააკმაყოფილა აღნიშნული შუამდგომლობა და მტკიცებულება ჰაბიდოსკოპიური ექსპერტიზის დანიშვნასთან დაკავშირებით დაუშვებლად იქნა ცნობილი.
ჩემმა კოლეგამ აღნიშნული გაასაჩივრა სააპელაციო სასამართლოში, ჯერჯერობით გადაწყვეტილება არ არის მიღებული, ველოდებით და ამიტომ არ არის არსებითი განხილვა დანიშნული”, – განაცხადა თათია მანეჟაშვილმა.
ლაზარე გრიგორიადისის მამის, ბექა გრიგორიადისის თქმით, საქმის გაჭიანურება შესაძლოა, იმით იყოს განპირობებული, რომ ლაზარეს საქმის მოსამართლე დასანქცირების კანდიდატი გახდეს.
“ჩვენ ორი დღის წინ უნდა გვცოდნოდა და უფრო ადრე, ვინ იქნებოდა მოსამართლე, მაგრამ მოსამართლე არ ვიცით. შეიძლება, აქვთ შიში, რომ მეხუთე კაცი არ იყოს სანქცირებული, რადგან კარგად იციან, რომ ამ საქმეზე მაღალი საზოგადოებრივი ინტერესია”, – განაცხადა ბექა გრიგორიადისმა.
21 წლის ლაზარე გრიგორიადისი პოლიციამ 29 მარტის ღამით დააკავა. მას ედავებიან რუსული კანონის წინააღმდეგ პარლამენტთან გამართულ აქციებზე პოლიციელთა მიმართ ძალადობასა და შსს-ს კუთვნილ ავტომობილზე ცეცხლის წაკიდებას. დაკავებულს 7-დან 11 წლამდე პატიმრობა ემუქრება. 31 მარტს მას სასამართლომ წინასწარი პატიმრობა შეუფარდა.
კომენტარები