ვერაზე მომხდარი სისხლიანი გარჩევის მოტივი შესაძლოა წარსულში დაჭრა ყოფილიყო. ამის შესახებ ინფორმაციას „მთავარი არხი“ ავრცელებს.
“მთავარ არხს” წყარო ეუბნება, რომ წარსულში საბა გახოკია გიჩო მარგველაშვილმა დაჭრა.
სათვალთვალო კამერების ვიდეო-ჩანაწერებში კარგად ჩანს როგორ დაიწყო სისხლიანი დაპირისპირება და როგორ ესვრის პირი ბიზნესმენ გიჩო მარგველაშვილს იარაღიდან, ამ უკანასკნელს კი მარგველაშვილის დაცვა უხსნის საპასუხო ცეცხლს.
სროლის შედეგად, საბა გახოკია ადგილზე დაიღუპა, დაიჭრა კიდევ ერთი პირი, უცხოეთის მოქალაქე. გიჩო მარგველაშვილიც და საბა გახოკიაც დეველოპერულ ბიზნესში იყვნენ ჩართულები. ჩვენი ინფორმაციით, წარსულში ორივე ნასამართლევია.
გიჩო მარგველაშვილი ამ დრომდე ხეჩინაშვილის კლინიკაში რჩება. მესამე პირი, უცხო ქვეყნის მოქალაქე, რომელიც სროლისას დაიჭრა, უკვე გაწერეს.
“ჩაუტარდა ოპერაციული ჩარევა, ამ წუთას მკურნალობას აგრძელებს რეანიმაციის განყოფილებაში. ამ ეტაპზე მისი ზოგადი მდგომარეობა რჩება მძიმე, საყურადღებო”, – ამბობს ექიმი.
საქმეზე დაკავებულია გიჩო მარგველაშვილის დაცვის სამსახურის თანამშრომელი. გამოძიების ინფორმაციით, დაკავებულმა გასროლა საპასუხოდ განახორციელა.
კომენტარები