“უნდა დასანქცირდეს“ – „ნაციონალური მოძრაობა“ კალაძის წინააღმდეგ კამპანიას იწყებს

დასანქცირდეს რუსი კალაძე- ამ სლოგანით „ნაციონალური მოძრაობის“ წევრები თბილისის მერიასთან თბილისის მერის, კახა კალაძის წინააღმდეგ აქციას მართავენ.

როგორც პარტიის ერთ-ერთმა წევრმა ირაკლი ფავლენიშვილმა ჟურნალისტებს განუცხადა, კახა კალაძე ბოლო დროის განმავლობაში ანტიდასავლურ განცხადებებს აკეთებს, რაც ქვეყნის დემოკრატიას ძირს უთხრის, ამიტომ, მისი თქმით, აპირებენ კახა კალაძის წინააღმდეგ კამპანია წამოიწყონ და

კალაძის მიერ გაკეთებული ანტიდასავლური განცხადებების შესახებ ინფორმაციას მიაწვდინონ უკრაინელებს და საერთაშორისო პარტნიორებს.

“კახა კალაძემ კიდევ ერთი ანტიდასავლური განცხადება გააკეთა. ბოლო თვეების განმავლობაში ის სისტემატურად აკეთებს ანტიუკრაინულ და ანტიდასავლურ განცხადებებს. ძირს უთხრის ქართველი ხალხის კონსტიტუციაში ასახულ მისწრაფებას გახდეს ევროპული ოჯახის წევრი. ეს ყველაფერი ცინიკურია, როდესაც ვიცით, რომ მისი ოჯახის წევრები ევროკავშირის მოქალაქეები არიან და თვითონ სურთ, რომ ჩვენ რუსეთის გუბერნიის მოქალაქეები ვიყოთ. ამიტომ, ჩვენ ვიწყებთ კამპანიას კალაძის წინააღმდეგ, მათ შორის თანამშრომლობას დავიწყებთ პარტნიორებთან და მათ კონკრეტულ მასალებს მივაწვდით, თუ როგორ უთხრის ძირს ის ქართულ დემოკრატიას და ევროპულ ინტეგრაციას. უნდა მოხდეს მისი სანქცირება. ერთ-ერთი ის ადამიანი, პოლიტიკური თანამდებობის პირი, რომლის სანქცირების საკითხი უნდა განიხილონ პარტნიორებმა, მათ შორის უკრაინულმა მხარემ და ევროპამ, ეს არის კახი კალაძე. ის ამ ანტიდასავლური ისტერიის მთავარ სახედ იქცა”, განაცხადა ფავლენიშვილმა.

მერიასთან იმყოფება საპატრულო პოლიცია.