„რაღა ეს ხალხი გამოეპარათ? თან ყველა? ეს აბსურდია, დაუჯერებელია“ – დავით ჭიჭინაძე

ლევან ჯავახიშვილი

„ალიას“ ესაუბრება პოლიტიკური მოძრაობა „ტრიბუნას“ ლიდერი, დავით ჭიჭინაძე.

– დავით კეზერაშვილის ქოლ–ცენტრებზე მინდა გკითხოთ. 2–3 თვის წინ, ყველა ტელევიზიამ რამდენიმე სიუჟეტი მოუძღვნა ამ თემას,  ოპოზიციურმა არხებმაც კი, მაგრამ ხელისუფლება, სამართლდამცვები არ განძრეულან. „ბიბისი“–მ  სიუჟეტი რომ გააკეთა კეზერაშვილსა და მის ქოლ–ცენტებზე, გერმანიის საგამოძიებო სტრუქტურამ როცა დაიწყო ევროპის ქვეყნების მოქალაქეების ძარცვის  ამბის გამოძიება,  ჯამში 1  მილიარდ დოლარზე მეტის, ხელისუფლება მერე აყვირდა და ახლა კეზერაშვილის ექსტრადიციას მოითხოვენ საქართველოში ჩადენილი სხვა დანაშაულებებისთვის. „ბიბისი“–ის სიუჟეტამდე ხმა რატომ არ ამოიღეს? ეს რა მიდგომა და პრინციპია?

– მანდ არანაირი პრინციპი არ ჩანს, ყველასთან და ყველაფერთან დაკავშირებით მიკერძოებული  მიდგომებია. ოპოზიციაც და ხელისუფლებაც საკუთარი სარგებლიდან გამომდინარე საუბრობენ. სხვას რას იფიქრებ, კეზერაშვილს „კრიშავდნენ“, ამ ბინძურ საქმეში ხელისუფლების წარმომადგენლებიც არიან გარეულნი და ვიდრე „ბიბისი“–მ არ გააშუქა ეს საქმე, ვიდრე გერმანელებმა გამოძიება არ დაიწყეს, მანამდე ჩუმად იყვნენ. თუ იცოდნენ და ჩუმად იყვნენ, ლოგიკურად, ფულსაც იღებდნენ ამ საქმიდან.  კეზერაშვილის ქოლ–ცენტრების ამბავი ყველამ იცოდა, ყველფერი კარგად იცოდნენ, მაგრამ  არ უნდოდათ ამ საქმის გამოძიება. გამოძიება რომ დაეწყოთ, იმ ქოლ–ცენტერებში მომუშვე ხალხის კვალზე იოლად გავიდოდნენ და კეზერაშვილს და მის ამფსონებს იოლად მიადგებოდნენ, რადგან მათგან ბევრი გარიგებაზე წავიდოდა, ქოლ–ცენტრების უკან ვინც დგას, იმათ ვინაობასაც დაასახელებდნენ და მთელ სქემასაც, როგორ პარავდნენ ფულს ევროპელებს.  მაგის გარდა, ერთი კომპიუტერიდან, დღეში  ასეულობით სატელეფონო ზარი  რომ ხორციელდება ევროპის ქვეყნებში, ე.ი. რაღაც ვერ არის საქმე. რა ვიცი, სუს–ი ყველას კომპიუტერში და ტელეფონში დაძვრება, ჩხრეკს,  უსმენს  და უამრავი ადამიანი არის ჩარული ამ საქმეში და რაღა ეს ხალხი გამოეპარათ? თან ყველა? ეს აბსურდია, დაუჯერებელია. ამ სკანდალისა და  საერთაშორისო სირცხვილის თავიდან აცილება შეიძლებოდა, მაგრამ ეს  არ გააკეთეს.

– თან, გერმანელი გამომძიებლები აცხადებენ, რომ საქართველოს 13 000 მოქალაქეა ჩართული მხოლოდ კეზერაშვილების ქოლ–ცენტერების საქმეში. 13 000 ადამიანი ერთობლივ დანაშაულს სჩადის და შსს–მ, სუს–მა  და პროკურატურამ არაფერი იცოდა? ინფორმატორები არ ჰყავთ?

– რა ვერ გაიგეს? იცოდნენ ყველაფერი, მაგრამ  არ უნდოდათ და არ გამოიძიეს. გარშემო მიიხედ–მოიხედე და ყველაფერს დაინახავ, გაიკითხე და ყველა მოგიყვება ყველაფერს. ქართულმა ტელევიზიებმა ხალხის გაქურდვის სქემაც დადეს, ამ საქმეში  კეზერაშვილის პარტნიორებიც დაასახელეს, ისინი, ვინც მაშინ საქართველოში იყო და არც ერთი მათგანი არ დაუკითხავთ. სამწუხროდ, ძალიან დიდი რეპუტაციული ზიანი მიიღო სახელმწიფომ. ჩვენ „ბიბისიმ“ ძალიან არასასიამოვნო კუთხით წარმოგვაჩინა. როცა ესეთ მასშტაბურ თაღლითობასთან გვქვს საქმე,  ქვეყნისთვის ასეთ რეპუტაციულ ზიანთან, კეზერაშვილიც უნდა დაისაჯოს და ხელისუფლების ის წარმომადგენლებიც, ვინც მას „კრიშავნენ“. ხელისუფლების მფრველობის გარეშე ამას ვერ გაბედავდნენ, ხელისუფლება და ყველა ძალოვანი უწყება ჩართულია ამ საქმეში და სასწრაფოდ უნდა დაიწყოს გამოძიება. რას გამოიძიებენ, ეს სხვა საქმეა, მაგრამ გამოძიება აუცილებლად უნდა დაიწყოს.