ევროპარლამენტში დარეგისტრირდა რეზოლუციის ორი ტექსტი, რომელშიც ივანიშვილის სანქცირებას ითხოვენ

ევროპარლამენტმა შესაძლოა მიიღოს ახალი რეზოლუცია, რომელშიც ბიძინა ივანიშვილი ოლიგარქად არის მოხსენიებული და მოთხოვნილია, რომ საქართველოში პოლიტიკური პროცესის გაუარესებაში მისი როლის გამო, ევროპულმა საბჭომ, სხვა დემოკრატიულ ინსტიტუტებთან ერთად, მას პერსონალური სანქციები დაუწესოს.

ევროპარლამენტში მიხეილ სააკაშვილის ჯანმრთელობის მდგომარეობის გაუარესებასთან დაკავშირებით დებატები დღეს, 13 თებერვალს გაიმართება. საკითხთან დაკავშირებით პარლამენტში რეზოლუციის 5 ტექსტია დარეგისტრირებული, მათგან ორში საუბარი შეეხო ბიძინა ივანიშვილის, როგორც ოლიგარქის, როლს საქართველოში არსებულ პოლიტიკურ პროცესებში.

ერთი რეზოლუციის ტექსტის ავტორი ევროპის სახალხო პარტიაა (EPP), მეორის კი ევროპული კონსერვატორებისა და რეფორმისტების ჯგუფი.

EPP მიხეილ სააკაშვილის ჯანმრთელობაზე პასუხისმგებლობას ბიძინა ივანიშვილს აკისრებს და ევროპის საბჭოს მის წინააღმდეგ სანქციების დაწესებისკენ მოუწოდებს.

“ხაზს უსვამს ოლიგარქ ბიძინა ივანიშვილის ფუნდამენტურ როლს მიხეილ სააკაშვილის პატიმრობაში, როგორც მისი პირადი შურისძიების ნაწილს. კიდევ ერთხელ მოუწოდებს საბჭოს და დემოკრატიულ პარტნიორებს, განიხილონ ივანიშვილისთვის პირადი სანქციების დაწესება საქართველოში პოლიტიკური პროცესის გაუარესებაში მისი როლის გამო. მოუწოდებს კომისიის ვიცე-პრეზიდენტს,საგარეო საქმეთა და უსაფრთხოების პოლიტიკის საკითხებში უმაღლეს წარმომადგენელს, აქტიურად ჩაერთოს ყოფილი პრეზიდენტის გათავისუფლების უზრუნველსაყოფად”, – წერია EPP-ის ტექსტში.

რაც შეეხება რეზოლუციის მეორე ტექსტს, ევროპული კონსერვატორებისა და რეფორმისტების ჯგუფი აღნიშნავენ, რომ ევროკავშირის გაწევრიანების გზაზე, ნაბიჯები, რომელსაც ხელისუფლება დგამს, ლაკმუსის ტესტი იქნება.

“გამოხატავს ღრმა შეშფოთებას ტოქსიკოლოგიურ ანგარიშთან დაკავშირებით, რომლის თანახმადაც, მიხეილ სააკაშვილის არაერთი პათოლოგიური სიმპტომი მძიმე ლითონით მოწამვლის შედეგია, რაც ხელს უწყობს მისი ჯანმრთელობის მდგომარეობის გაუარესებას. ხაზს უსვამს, რომ საქართველოს მთავრობა ეკისრება სრულ პასუხისმგებლობას ყოფილი პრეზიდენტის ჯანმრთელობასა და კეთილდღეობაზე და პასუხი უნდა აგოს, იმ შემთხვევაში, თუ მას რამე დაემართება. კიდევ ერთხელ მოუწოდებს სალომე ზურაბიშვილს გამოიყენოს თავისი კონსტიტუციური უფლება ამ საკითხის მოსაგვარებლად.

განიხილავს მიხეილ სააკაშვილის ირგვლივ არსებულ შექმნილ ვითარებას და საქართველოს ხელისუფლების ქმედებებს, როგორც ლაკმუსის ტესტს ევროპული ღირებულებებისადმი ერთგულების სურვილის კანდიდატის სტატუსის მინიჭებასა და საბოლოო ჯამში, ევროკავშირში გაწევრიანების კუთხით. გმობს საქართველოს ერთადერთი ოლიგარქის, ბიძინა ივანიშვილის პირად როლს მიხეილ სააკაშვილის პატიმრობასა და ჯანმრთელობის მდგომარეობის გაუარესებაში. კიდევ ერთხელ მოუწოდებს საბჭოსა და ევროკავშირის დემოკრატიული პარტნიორების მიმართ მოწოდებას, განიხილონ ივანიშვილისთვის პირადი სანქციების დაწესება, საქართველოში პოლიტიკური პროცესების გაუარესებაში მისი როლის გამო”, – ნათქვამია რეზოლუციის ტექსტში.