„სწორედ ტელევიზიების, მედიის, თეოლოგების და ექსპერტების ბრალია ქართველი ხალხის სიბრმავე და სიყრუე, საქართველოს საპატრიარქოსთვის პატიებული არაერთი უმსგავსობა“ – გოჩა მირცხულავა

აქ და დღეს იცით პრობლემა რა არის?

პარლამენტის წინ რომ რკინის ჯვარი დადგეს და ჩვენი უნიათო ხელისუფლება ვერ ახერხებს მის აღებას, ხოლო კონფორმისტი ოპოზიციონერები ამაზე დუმან – ეს გახლავთ პრობლემა.

პრობლემაა, როდესაც არჩევნებში გამარჯვების უზრუნველსაყოფად პოლიტიკური კლასი ხალხთან კი არ მიდის სასაუბროდ, ძღვენით ეახლებიან საპატრიარქოს და პატრიარქის დალოცვა მიაჩნიათ გამარჯვების გარანტიად.

პრობლემაა, როდესაც საპატრიარქო მანიპულირებს მედიით, ექსპერტებით, თეოლოგებით, ცალკეული სასულიერო პირებით და ყურადღება გადააქვს ვითომ მორალურ-ზნეობრივ საკითხებზე. ამ დროს თავად რუსული ინტერესების გატარებით არიან დაკავებულები და საკუთარ ანტისახელმწიფოებრივ განზრახვებს ფუთავენ.

პრობლემაა, რომ საქართველოს ეკლესია ლამის 2000 წელია ძველი აღთქმით ცხოვრობს და ახალი აღთქმა არც კი გადაუშლიათ.

პრობლემაა, უსიყვარულობა და სიძულვილი რომლითაც არის აღვსილი საქართველოს ეკლესიის სამღვდელოების უმეტესი წარმომადგენლის გულიც და სულიც.

პრობლემა კიდევ ის გახლავთ, ამ ქვეყანაში ასობით ადამიანი რომ შიმშილობს და ჩვენ საპატრიარქოს გაზულუქებით ვარ დაკავებულნი – ჩვენს სიმწრით ნაშრომ და ნაჯაფ ფულს რომ ვუხდით მათ ცრუ განათლებასა და სტომაქის ამოყორვაში.

პრობლემაა, როდესაც ვიცით, აფხაზეთი რუსეთის ეკლესიას გადასცეს საპატრონოდ და ვითომც არაფერი – ვდუმვართ;

პრობლემაა, როდესაც ვიცით, კირილის გამორჩეულია რეალურად მოსაყდრე და ჩვენგან მისთვის მოდრეკილი თავი და მიძღვნილი ამბორი, იუდას ამბორის ტოლფასია – ქრისტეს ვღალატობთ და ვყიდით.

პრობლემაა, რომ ჩვენ ყველანი არ ვართ მმკ-ს წევრები, არ ვწვათ წიგნებს, არ ვკრძალავთ ფილმებს, არ ვგლეჯთ ნახატებს, არ ვამტვრევთ მუსიკალურ ინსტრუმენტებს, ვუცქერთ ტელევიზორებს, ვისმენთ რადიოს, ვკითხულობთ გაზეთებსა და ონლაინ გამოცემებს და პრინციპში რომ ვაზროვნებთ და საერთოდ ცოცხლები რომ ვართ ეგეც პრობლემაა.

უმთავრესი კი მაინც, ის არის პარლამენტის თავზე რუსული დროშა, რომ ვერ დავკიდეთ ამ დრომდე.“