“პრემიერ–მინისტრი თანამდებობიდან სწორედ კორუფციის გამო გაათავისუფლეს” – შალვა კერესელიძე

დეპუტატი, შალვა კერესელიძე, პარლამენტში მყოფ პრემიერ–მინისტრის გამოსვლას ეხმაურება და ამბობს:

თქვენი საუბრიდან მოქალაქეებს ეგონებათ, რომ საქმე კარგად მიდის და წლის ბოლოს საქართველოს კანდიდატის სტატუსი გარანტირებული აქვს – ეს ასე არ არის, ცვლილებები ხდება ფასადურად. ერთ მაგალითს მოვიყვან ანტიკორუფციული მიმართულებით, ევროპელმა მეგობრებმა მიიჩნიეს, რომ კორუფციის კუთხით საქართველოს აქვს პრობლემები და ანტიკორუფციული პოლიტიკის აღსრულება არაეფექტურია. არ არსებობს დამოუკიდებელი ანტიკორუფციული სამსახური, პირდაპირ გვითხრეს, რომ შეიქმნას ერთიანი ანტიკორუფციული სამსახური, რომელსაც ექნება რეალური ბრძოლის ფუნქცია. წარვადგინეთ ჩვენი მოსაზრებები, მაგრამ ოცნებამ წარმოადგინა პროექტი, რომლის ფუნქციაც არა კორუფციის წინააღმდეგ ბრძოლაა, არამედ კორუფციის ხელშეკწყობა. რაც მთავარია, ხელმძღვანელს ნიშნავს საქართველოს პრემიერ–მინისტრი – რამდენად ეფექტური იქნება ეს? მით უმეტეს, პრემიერ–მინისტრი, რომელიც რამოდენიმე წლის წინ ქართული ოცნების პარტიის ხელმძღვანელმა თანამდებობიდან სწორედ კორუფციის გამო გაათავისუფლა. ჩვენ, ქართველ ხალხთან ერთად, არ მოგცემთ იმის უფლებას, ქვეყანა ევროკავშირის ნაცვლად, შეიყვანოთ “დესეთეში”, “დესეთეში” უკვე ვიყავით და მწარედ ვიწვნიეთ. კეთილი ინებეთ და ვალდებულებები შეასრულეთ, რათა ქვეყანამ მიიღოს კანდიდატის სტატუსი.”