„ოცნება“ შეეშვება „ნაცმოძრაობის“ „ბუად“ გამოყენებას, ამ პარტიაში მიმდინარე პროცესები აჩვენებს, რომ პარტია შიგნიდან გამოლპა და არავითარ ხიფათს არ წარმოდგენს“ – დავით ჭიჭინაძე

ლევან ჯავახიშვილი

„ალიას“ ესაუბრება პოლიტიკური მოძრობა „ტრიბუნას“ ლიდერი, დავით ჭიჭინაძე.

– ბოლო 5-6 წელია, ნებისმიერი გამოკითხვით, იმ ხალხის რაოდენობა, რომელსაც არც ეს ოპოზიცია უნდა ხელისუფლებაში და არც „ქართული ოცნება“, 50%-ზე ნაკლებს არ ჩამოსცილებია. „ენ-დი-აი“-ის ბოლო კვლევებით კი 61%-ს მიღწია ამ ხალხის რაოდენობამ.  ოპოზიციის ზოგიერთი ლიდერი ვერ უნდა მიხვდეს, რომ საერთოდ წავიდნენ პოლიტიკიდან და ახალ ძალებს დაუთმონ ასპარეზი? ვერ ხედავენ, რომ ქვეყნის განვითარებას აფერხებენ და „ქართულ ოცნებას“ ხელისუფლებაში ყოფნას უხანგრძლივებენ?

– ესენი პოლიტიკით იკვებებიან, პოლიტიკაა მათი საკვები. ჩემამდე ეგ არ დადის ზუსტად, რომ ხალხი ბრბო ჰგონიათ. ფიქრობენ, რასაც უნდათ, იმას მოატყუებენ. ეს 61%  იმის დასტურია, რომ ხალხი არ ტყუვდება. ეს ადამიანები საკუთარი ფინანსური ინტერესების გამო არიან პოლიტიკაში და ან ოპოზიციური ნიშიდან, ძალიან ბევრ ფულს შოულობენ. სად უნდა წავიდნენ, ხელმოცარული ხალხია და მათი უმეტესობისთვის, პოლიტიკა უკანასკნელი თავშესაფარია. დამოუკიდებლად არაფრის კეთება შეუძლიათ. ეს არის საზოგადოება, რომელიც პოლიტიკაში ყოფნით, ვაჭრობით არსებობს და ხელისუფლება ხალხს უწყობს ასეთი ოპოზიციის არსებობას. ამით ხელისუფლება ხალხს აჩვენებს, შეხედეთ, ჩვენი შეცვლის პრეტენზია ვის აქვს, ჩვენზე უარესები არიანო. რეალურად, ამ ქვეყანაში ვინც ფიქრობს, რომ ხალხისთვის რაიმე სასიკეთოდ უნდა შეიცვალოს, იმ პოლიტიკურ ძალებს „ქართული ოცნება“ და ეს ვითომ ოპოზიცია, ერთობლივი ძალით ცდილობენ, გაუყალბონ არჩევნები, დაუკეტონ ფინანსური და სხვა რესურსები. ამას იმიტომ აკეთებენ, რომ ამ ხელისუფლებასთან მოვაჭრე ოპოზიცის ადგილი პატიოსანმა, ქვეყნის მოყვარულმა ხალხმა არ დაიკავოს და ხელისუფლებასთან ივაჭროს კი არა, რეალური ბრძოლა არ გამოუცხადოს მას. ცხადია, ეს არც ოპოზიციას აწყობს და არც ხელისუფლებას, ორივე დაზარალდებიან. არ ვიცით, რაც ხდება? ზოგი ვიღაცის სიძეა, ზოგი ვიღაცის ნათესავი თუ მეგობარი. ქართულ პოლიტიკაში რაც არ ყოფილა, ის შექმნა ბიძინა ივანიშვილმა – ხელისუფლების მიერ დანიშნული და მოვაჭრე ოპოზიცია. ამით დააკნინა ქართული პოლიტიკა და მეტიც, ბოლომდე მოკლა. ამიტომაც არის, პარლამენტში და საკრებულოებში აღარ არის პოლიტიკა, დღეს ქუჩაშია პოლიტიკა. ზუსტად ამის გამო, ეს  არსებული ვითარება ორივეს აწყობს. 61% კი არა, მალე 70%-მდე ავა იმ ხალხის რაოდენობა, ვისაც არც „ქართული ოცნება“ ენდომება და არც ეს ოპოზიცია… ყველაფერს აკეთებენ, დეპუტატები გახდნენ და 4 წელი ბიუჯეტის ხარჯზე კომფორტულად იცხოვრონ და თან დამატებითი მატერიალური სარგებელი მიიღონ. ესენი იბრძოლებენ, საარჩევნო ბარიერი დასწიონ მთლად 1 პროცენტამდე. ირწმუნებიან, თუ ბარიერი დაბალი იქნება, ბევრი პარტია იქნება პარლამენტში და ეს დემოკრატიას წაადგებაო. ჰა, შესულები არიან სხვა და სხვა პარტიები პარლამენტში და რა გაკეთეს ქვეყნისთვის სასიკეთო? დაეტყო რამე სასიკეთო ქართულ დემოკრატიას? არც არაფერი. ხელისუფლებაში თუ ისევ „ქართული ოცნება“ იქნება, რა მნიშვნელობა აქვს, 10 პარტია იქნება პარლამენტში თუ 20? თუ ხელისუფლების შეცვლა გინდა, მაშინ არც  5%-ინი  ბარიერისა უნდა გეშინოდეს. თუმცა, მაგათ კარგად იციან, ამ 5%-იან ბარიერს, ყველანი რომ გაერთიანდნენ, მაინც ვერ გადალახავენ. ეს ბარიერი, რომ გადალახონ, უნდა დაუბრუნდნენ თავიანთ საწყისს, „ნაცმოძრაობას“ და მერე გამოჩნდება, რომ „ნაცმოძრაობისგან“ შორს არ წასულან და ამდენი ხანი ატყუებდნენ ხალხს. მატყუარების არჩევას კი ჯობია, საერთოდ არ აირჩიო. ვფიქრობ,  „ქართული ოცნებაც“ შეეშვება  „ნაცმოძრაობის“ საარჩევნო ბუად გამოყენებას, ამ პარტიაში მიმდინარე პროცესები აჩვენებს, რომ პარტია შიგნიდან გამოლპა და არავითარ ხიფათს არ  წარმოდგენს. “ნაცმოძრაობას“ ხელისუფლებაში დაბრუნების პერსპექტივა აქვს ნული. „ნაცმოძრაობის“ იდეური ამომრჩეველი, რომელიც  ყველა არჩევნებზე მეტ-ნაკლები სტაბილურობით უჭერს  მხარს, უნდა გამოფხიზლდეს.  ეს ხალხი უნდა მიხვდეს, რომ „ნაცმოძრაობა“ არ არის ის პარტია, რომელიც ამ ქვეყანაში რაიმეს შეცვლის ოპოზიციიდან და ხელისუფლებაში კი ვერასდროს დაბრუნდებიან.  საბოლოოდ კი, ყველა უნდა მიხვდეს, რომ თუ რეალურად რაიმეს შეცვლა უნდათ, უნდა დაიწყოს ხალხის ინტერესებზე ორიენტირებული ახალი მოძრაობა.