“რადიო თავისუფლების” ცნობით, საქართველოს ფიგურული ციგურაობის ნაკრებს 13 წლის ინგა გურგენიძე უერთდება. ის ამჟამად ოჯახთან ერთად რუსეთში, ქალაქ ყაზანში ცხოვრობს. გამოცემის ცნობით, საქართველოს მოქალაქეობის მისაღებად საჭირო პროცედურები უკვე გაიარა და რამდენიმე კვირაში დებიუტიც ექნება.
ქართველი მოციგურავის გადაწყვეტილებამ რუსეთში ბევრი ადამიანი გააღიზიანა: „საქართველო კვლავ გვართმევს ტალანტებს”, ამ სათაურით აქვეყნებს სტატიას ერთერთი რუსული გამოცემა.
„საქართველოს ნაკრების რიგები რუსეთიდან კიდევ ერთი მოციგურავით შეივსო. ინგა გურგენიძე 13 წლისაა, მას უკვე შეუძლია ახალგაზრდულ საერთაშორისო შეჯიბრებებზე გამოსვლა და… არავინ იცის, მიეცემოდა ამის შანსი, რუსეთში რომ დარჩენილიყო. საქართველოში გადასვლით კი მას რეალურად შეუძლია, ახალგაზრდებს შორის მსოფლიოს ჩემპიონატის საგზურის მოსაპოვებლად იბრძოლოს და სამომავლოდ ნაკრების ლიდერიც გახდეს“ – დაწერა რუსულმა სპორტულმა გამოცემამ.
ინგა გურგენიძემ გასულ წელს ყაზანის საქალაქო პირველობაში მიიღო მონაწილეობა და ჩემპიონი გახდა. ამასთან, რუსეთის ჩემპიონატში მონაწილეობის უფლებაც მოიპოვა.
საქართველოს ფიგურული ციგურაობის ფედერაციის პრეზიდენტ მაკა გიორგობიანის განცხადებით, ინგა გურგენიძის დებიუტი საქართველოს ნაკრების შემადგენლობაში ერთ თვეში შედგება. 13 წლის სპორტსმენს საერთაშორისო გამოცდილება ჯერ არ აქვს და მისთვის სარეიტინგო ქულების ათვლა, სწორედ შემოდგომის გრან პრის ეტაპებიდან დაიწყება.
კომენტარები