ინდოეთის ერთ-ერთი ტაძრიდან, ნახევარი საუკუნის წინ, ქალღმერთის მოპარულ ქანდაკებას აშშ-ში მიაკვლიეს

სამხრეთ-აღმოსავლეთ ინდოეთში, ტამილნადუს შტატში მდებარე ტაძრიდან 50 წლის წინ მოპარული ქალღმერთ პარვატის ქანდაკებას ნიუ-იორკში მიაკვლიეს, – ამის შესახებ BBC წერს.

ქალღმერთის მე-12 საუკუნეში შექმნილ გამოსახულებას ბონჰამსის აუქციონის სახლში მიაგნეს. „ბონჰამსი“ არის აუქციონის კერძო საერთაშორისო სახლი, რომლის სათაო ოფისი ლონდონში მდებარეობს.

პოლიციის ცნობით, მზადდება საბუთები, რათა ქანდაკება უკან, ინდოეთში დააბრუნონ.

ქანდაკება, რომლის სიმაღლეც დაახლოებით 52 სანტიმეტრია, ერთ-ერთია ხუთ ქანდაკებას შორის, რომელიც ინდური ტაძრიდან ათწლეულების წინ დაიკარგა.

„ჩვენ გვაქვს უფლება, მოვითხოვოთ ქანდაკების მესაკუთრის გამჟღავნება, ვინაიდან ინდოეთი იუნესკოს მსოფლიო მემკვიდრეობის 1972 წლის კონვენციის ერთ-ერთი ხელმომწერია“, – აცხადებენ პოლიციაში.

აუქციონის სახლს ჯერ ამაზე კომენტარი არ გაუკეთებია.