ვერაზე მოკლული 22 წლის ნიკა კვარაცხელიას დედა იზა ომაძე სოციალურ ქსელში პოსტს აქვეყნებს, რომელშიც წერს, რომ 12 აგვისტოს, ნიკას დაბადების დღეზე, გაიმართება წიგნის პრეზენტაცია, ნიკა კვარაცხელიას ცხოვრების შესახებ.
“რომ მეგონა, იმაზე მეტად ტკივილით იფურცლება აგვისტოს დღეები, ეს თვე ხო ჩვენთვის ახალი ცხოვრების დასაწყისთან ასოცირდებოდა, გავხდით მშობლები და ასე დაიწყო ღვთის წინაშე ყველაზე დიდი პასუხისმგებლობის ზიდვა… მერე? მერე უფალმა ერთად ხუთი სიცოცხლე გვანდო, მარიამობის თვემ პირველი შენი თავი გვაჩუქა, დე…. მიჭირს ამიტომ ძალიან მიჭირს ეს თვე… ყოველი დღე რომელიც 12 აგვისტოს გვაახლოვებს გაუსაძლისად მტკივნეულია, ყველგან დაგეძებთ, ზეცაში, წყალში, ყველა მტრედი ჩემი ნიკო მგონია…
“თუ არაფერში მივდივარ საშიში არაფერია, რადგან არაფერში არაფერი არ არსებობს. თუ მართლა უნდა გარდავიცვალო და მეტი არაფერი, მაშინ მითუმეტეს არ უნდა შეგეშინდეს, ისევ ამ ქვეყნად დავრჩები”, – კი შენ ჩვენში ხარ, ჩვენთან ხარ, და ამავ დროს ხარ უფალთან მარადისობაში…
“მან დროს აჯობა და თავისი ცხოვრებით ასმაგად მეტი სიცოცხლე ჩაატია 22 წელში. ნიკომ ნამდვილად შეძლო, მისი ყოველი დღე ზუსტად ისეთი სავსე ყოფილიყო, როგორც მაჰათმა განდის ცნობილ გამონათქვამშია… ის დარჩება მუდმივად მანათობელ მზედ, რომელიც 1999 წლის 12 აგვისტოს, სრული დაბნელების მერე აკაშკაშდა…” შენ სულ 22 წლის იქნები, დე!!!
P.S. შენთვის ცხოვრება მარადისობაში გაგრძელდა, ბოროტება რომ ვერ დაამარცხეს საკუთარ თავში იმ ადამიანებს და ახალგაზრდებს სამუდამოდ დაუბნელდათ მზეც და მარადისობაც…12 აგვისტოს წიგნის “მომავლის ბიჭი” პრეზენტაციაა…” – წერს ნიკას დედა.
კომენტარები