ასოცირებული პროფესორი, ბექა კობახიძე:
“რატომ ასახლებენ უკრაინელ დევნილებს სასტუმროებიდან? – საკითხის დეკონსტრუქცია.
ომის საწყის ეტაპზე საქართველოს ხელისუფლებამ გაატარა შემდეგი პოლიტიკა:
ერთი მხრივ, ნულოვანი ჩართულობა სამხედრო საკითხებში, რუსეთისადმი მიმართულ სანქციებზე არ მიერთება, რუსეთის კრიტიკისგან თავის არიდება;
მეორე მხრივ, დასაბალანსებლად, სრული ჰუმანიტარული მხარდაჭერა უკრაინელ ლტოლვილებს და საერთაშორისო ორგანიზაციებში უკრაინის საკითხის პოლიტიკური მხარდაჭერა.
ამის შემდეგ, აირია ურთიერთობა უკრაინის ხელისუფლებასთან, გადავიდნენ ამერიკის და ევროკავშირის ლანძღვაზე და ა.შ.
საერთოდ, საერთაშორისო ურთიერთობებში მიღებული პრაქტიკაა, ერთგვარი დიპლომატიური მესიჯია, რომ კონკრეტული ქვეყნის მოქალაქეებს ექცევი ისე, როგორც ექცევი ამ ქვეყანას.
ურთიერთობის არევის კვალდაკვალ, საქართველოს ხელისუფლებამ გადაწყვიტა შეწყვიტოს ჰუმანიტარული ძალისხმევაც უკრაინის და მისი მოქალაქეების სასარგებლოდ და ასე გადაუხადოს სამაგიერო არახამიას, პოდოლიაკს, ზელენსკის თუ სხვებს.
ეს არის ქართული ოცნების მორიგი სამარცხვინო ლაქა ჩვენს ისტორიაში, რომლის ჩამორეცხვა არ იქნება ადვილი. საკუთარი პოლიტიკური თამაშების მძევლად გაუბედურებული ლტოლვილების ქცევა არაფერში წერია.
რაც მთავარია, ცდილობენ ეს ქმედება შეგვასაღონ შემდეგი მესიჯებით: “ჩვენ გაჭირვებული ქვეყანა ვართ და ბევრი არაფერი შეგვიძლია”, “ჩვენ ლტოლვილებს რატომ არ ეხმარებით?”, “როდემდე შეგვიძლია მათი შენახვა?” და ა.შ.
დგანან ქოცები და “ქოცი არა ვარ, მაგრამ” სუბიექტები და იმეორებენ ამ სისულელეს.
რატომ არის ეს სისულელე?
1. საუბარი გვაქვს რამდენიმე ასეულ ადამიანზე და მათი შენახვა მონეტარულად საერთოდ არ არის კატასტროფული ტვირთი. ამ ქმედებით ბევრად მეტს მოიგებს სახელმწიფო, ჩვენი ისტორია და ჰუმანიზმი, ვიდრე ეს იქნება დანახარჯი. მეტადრე, ყოველდღე გვეუბნებიან, ორნიშნა ეკონომიკური ზრდა გვაქვს ამ ომის “წყალობით” და ეგება სინდისი იყოს კაი საქონელი, რომ რუსების შემოდენით ნაშოვნი ფულის მცირე ნაწილი რუსებისავე მსხვერპლებს მოვახმაროთ.
შეხედეთ პოლონეთს, ავსტრიას და დასავლეთის სხვა ქვეყნებს, ეკონომიკური რეცესიის მიუხედავად, როგორ ექცევიან ბევრად უფრო დიდი რაოდენობის უკრაინელ ლტოლვილებს. ჩვენ ცივილიზაციურად სად და ვის მხარეს ვდგავართ?;
2. დავუშვათ რომ უკიდეგანოდ ძუნწები ან უკიდეგანოდ გაჭირვებულები ვართ, არ გვინდა ან არ შეგვიძლია უკრაინელებზე ფულის დახარჯვა. არც ეს არის ჰუმანიტარული ჩართულობისგან თავის არიდების სათანადო მიზეზი. მოლდოვამ ევროკავშირს განუცხადა, რომ უკრაინელი ლტოლვილები მომაწყდნენ, მე ფული არ მაქვს, მომეცი და მივხედავო. ევროკავშირმა მისცა ეს ფული მოლდოვას. საქართველომ ევროკავშირისგან ამ ფულის აღებაზეც უარი თქვა და საერთოდ მგონი ყველაფერზე;
3. ვთქვათ არც ლტოლვილებზე ფულის დახარჯვა გვინდა, არც ევროკავშირისგან ფულის აღება და არც არაფერი. მაინც შეგვეძლო ამ ხალხთან ცივილიზებულად მოქცევა. კერძოდ, საქართველოში ჩამოდიან ის უკრაინელები, ვინც ფრონტის ხაზს მიღმა რუსული ოკუპაციის მხარეს დარჩნენ. ისინი გადადიან რუსეთში და შემოდიან საქართველოში.
დასავლეთის ქვეყნებს კვოტები აქვთ დაწესებული ვინ რამდენ უკრაინელ ლტოლვილს მიიღებს, შემწეობას გაუწევს, ბინას მისცემს, დაასაქმებს. ძალიან დიდ ციფრებზეა საუბარი. საქართველოს შეეძლო ეს ჰუმანიტარული საკითხი პოლიტიკურად გადაეწყვიტა და საქართველო გაეხადა სატრანზიტო ზონად. აქ ჩამოსული უკრაინელი, ჩვენი დახმარებით, გააკეთებდა დასავლურ სახელმწიფოებში გასამგზავრებლად საჭირო დოკუმენტაციას, მიიღებდა მუშაობის უფლებას და მათ ორგანიზებულად გავამგზავრებდით ევროპასა და ამერიკაში. 2020 წელს ავღანელები მივიღეთ ასე და უკრაინელებს რატომ ვერ მივიღებდით?
ჰოდა ამით იმის თქმა მინდა, რომ უკრაინელი დევნილებისადმი დემონსტრაციულად ცუდად მოქცევის ერთადერთი მიზეზი არის ის რომ უბადრუკი კობახიძე თუ სხვა უბადრუკები ზელენსკის და არახამიას ვერ სწვდებიან და გაჭირვებულ ლტოლვილებზე იყრიან ჯავრს.
ამ ფონზე ჩამოდგა “ბიდლო” და იმეორებს კობახიძის მესიჯებს.
დღეს კალაძემ კიდევ უფრო დიდი საოცრება თქვა: ჩვენ თანაბრად ვეკიდებით უკრაინელ, რუს და ბელარუს ტურისტებსო. მსგავსი საძაგლობა არ ვიცი პირიდან როგორ ამოუვიდა!
უკრაინელი რომ ტურისტი არ არის და რუსებთან ერთ კატეგორიაში გაერთიანება არ შეიძლება, მაგის ახსნა ბევრს გჭირდებათ?
გააუკუღმართეს ქვეყანაც, მორალიც, მტერთან და მოყვარესთან დამოკიდებულებაც. ვზივართ და ვერაფერს ვშველით. ვბრაზდებით, ვბრაზდებით, ვბრაზდებით, მაგრამ ეტყობა საკმარისად ბევრნი არ ვართ, ვინც ვბრაზდებით.”
კომენტარები