უკრაინული მედიის ინფორმაციით, სატელიტური სურათები ადასტურებს, რომ ოკუპირებულ ოლენივკაში შენობა, სადაც უკრაინელი სამხედრო ტყვეები იმყოფებოდნენ, რუსმა აგრესორებმა შიგნიდან ააფეთქეს.
საუბარია 29 ივლისს მომხდარ თავდასხმაზე, რა დროსაც აზოვსტალის ქარხნიდან ტყვედ აყვანილი სულ მცირე 53 უკრაინელი სამხედრო დაიღუპა, 75-ზე მეტი კი დაშავდა.
სატელიტური ფოტოები ამერიკელმა ჟურნალისტმა, კრისტოფერ მილერმა გამოაქვეყნა. კადრებში კარგად ჩანს, რომ შენობის თუნუქის სახურავი შიგნიდან არის დაზიანებული. შენობას არ აქვს სხვა ისეთი ტიპის დაზიანება, რომელიც მასზე ამერიკული HIMARS-ის სარაკეტო დარტყმას დაადასტურებდა.
“ოლენივკას ციხის ახალი ფოტოები, სადაც სულ მცირე 50 უკრაინელი სამხედრო. კიევის თანახმად და წინასწარი მონაცემებით, თავდასხმა რუსეთის ჯარებმა განახორციელეს”, – წერს ჟურნალისტი.
შეგახსენებთ, რუსეთი აცხადებს, რომ ოლენივკას ციხეზე დარტყმა უკრაინის არმიამ ამერიკის მიერ მიწოდებული HIMARS-ის გამოყენებით თავად განახორციელა. უკრაინის არმია კი აცხადებს, რომ იმ არეალში სარაკეტო ცეცხლი არ გაუხსნია და პასუხისმგებლობას მოსკოვს აკისრებს.
კომენტარები