ჟურნალისტი, ლაშა ბერულავა:
“სანამ ენმ-ისა და სხვა პარტიების ლიდერები არ დაიჯერებენ, რომ ყოველგვარი ფულის გადახდის, ორგანიზებისა და ორკესტრირების გარეშე, პარტიის წევრების ნაწილს შესაძლოა გაუჩნდეს აზრი, რომ პარტიის თავმჯდომარე უმოქმედობის ან არასათანადო მოქმედების გამო შესაცვლელია, მანამდე პარტიის მხარდამჭერებში ასე მოფიქრალთა რიცხვი გაიზრდება.
“რა ქნას ნიკა მელიამ, როგორ შეამტვრიოს ციხის კარი” – არასწორი გაპრავებაა, მისგან ეს არავის მოუთხოვია და თუ ვინმემ მოითხოვა, სისულელეა, მაგრამ მინიმუმ, სამოქმედო გეგმა და განცხადებების თანმიმდევრულობაა საჭირო და არა იმის დემონსტრირება, რატომ ჩამოვიდა, მე წინააღმდეგი ვიყავიო.
მორჩა, მოცემულობა ახლა არის ის, რომ ჩამოვიდა, ციხეში ზის და ჩვენს თვალწინ ცდილობენ მის მოკვლას, რაც ნიშნავს, მისი საკითხი დღის წესრიგში მთავარი უნდა იყოს.
წამებით კლავენ მესამე პრეზიდენტს, პარტიის დამფუძნებელს, ლიდერს – უკაცრავად, აბა სხვა რა უნდა იყოს მთავარი დღის წესრიგში?
არათანმიმდევრულობა, უთავბოლოდ გრძელი განცხადებები, რომლის თავი გავიწყდება, ბოლოში რომ ჩამოხვალ, სატელევიზიო გამოსვლების დროს მკვეთრი, მოკლე მესიჯების არარსებობა, ხალხის უთავბოლო ტარება აღმა-დაღმა არ უნდა იყოს მთავარი ოპოზიციური პარტიის ლიდერის მახასიათებელი და კი, უნდა გადადგეს და მანამდე ორგანიზება სჭირდება პარტიის თავმჯდომარის რიგგარეშე არჩევნებს.
ყველაზე რადიკალი მომხრეები შეიყვანოს მონიტორინგის ჯგუფში, ჩაატაროს პროცესი მაქსიმალურად გამჭვირვალედ და თვითონაც მიიღოს მონაწილეობა, არა როგორც ენმ-ის ლიდერმა, არამედ როგორც გადამდგარმა პოლიტსაბჭოს ხელმძღვანელმა.
აგვისტო ამ ეტაპის მოსამზადებლად გამოიყენოს და სექტემბერის ბოლოს არჩევნები – მშვენიერი გამოსავალი იქნება ვითარების განსამუხტად.
თორემ ასე იმ კაცს ვერაფერს ვერ ვუშველით და პარტიაც თავზე დაგვენგრა თითქმის. მართალია, წევრი არ ვარ, მაგრამ დაარსების დღიდან ამ პარტიას ვაძლევ ხმას, მაქვს ერთი რჩევის უფლება: გადადექი და ჩაატარე ახალი არჩევნები.
გაჩნდება შეკითხვა: მიშას მკურნალობის თემა დავივიწყოთ აგვისტოში? არა, არ დავივიწყოთ, პოლიტსაბჭომ აიღოს ინიციატივა. ამ გახსენებაზე, მგონი, პოლიტსაბჭოც განსაახლებელია და ზოგადად, ენმ – ცვლილებების დროა. კი არა, დაგვიანდა კიდეც.
კომენტარები