„ტყულად ხარობს ის ხალხი, ვისაც ჰგონია, რომ ამ ქვეყნებში პოლიტიკური კრიზისები უკრაინის ომმა გამოიწვია“ – სოსო ცინცაძე

ლევან ჯავახიშვილი

„ალიას“ ესაუბრება ექსპერტი, სოსო ცინცაძე.

– ბატონო სოსო, ბრიტანეთისა და ესტონეთის პრემიერები, ბორის ჯონსონი და კაია კალსი გადადგნენ, იტალიის პრემიერი, მარიო დრაგი მიდიოდა პოსტიდან, მაგრამ პრეზიდენტმა არ დააკმაყოფილა მისი სურვილი. ვრცელდება ინფორმაცია, რომ გერმანიის კანცლერს, ოლაფ შოლცსაც ცუდად აქვს საქმე და მალე დატოვებს პოსტს. რა ხდება? ზოგიერთი ექსპერტი ამბობს, უკრაინის ომმა გამოიწვია ეს სამთავრობო კრიზისები ევროკავშირის ქვეყნებში, კონკრეტულად კი, ომით გამოწვეული ეკონომიკური და  სოციალური პრობლემები სახელდება. ასეა?

– უკრაინის ომმა არა მარტო ევროკავშირის ზოგიერთ ქვეყანაში გამოიწვია ეკონომიკური და სხვა სახის პრობლემები, მაგრამ ეს სამთავრობო კრიზისები ამ ომს არ უკავშირდება. ბორის ჯონსონმა კორონაპანდემიის დროს, როდესაც მთელ ბრიტანეთში აკრძალვები იყო, ხალხმრავალი წვეულება გადაიხადა  და ეგ იყო მისი გადადგომის მთავარი მიზეზი. სად იყო მაშინ უკრაინის ომი? ჯონსონს თავის პარტიაშიც ბევრი მოწინააღმდეგე ჰყავდა და ესეც უკრაინის ომამდე იყო. ჯერ ჯონსონისთვის არც ერთ ბრიტანელ პოლიტიკოსს არ წაუყენებია პრეტენზია, უკრაინას ფულით და იარაღით ეხმარები და ამით ქვეყნას რაღაც აკლდებაო. პირიქით, ყველა იმას საყვედურობდა, უფრო მეტად უნდა დავეხმაროთ უკრაინასო. ესტონეთშიც ჩვეულებრივი სამთავრობო ცვლილებები მოხდა და ევროპაში ეს, სამთავრობო კრიზისები, ჩვეულებრივი  ამბავია. თუ შოლცი გადადგა, არც ეს იქნება პრობლემა, გერმანია უკრაინის მიმართ თავის დამოკიდებულებას არ შეცვლის. მეტიც, გერმანიაში, ორ რეგიონში წააგო შუალედური არჩევნები შოლცის „სოციალ-დემოკრატიულმა“ პარტიამ და მიზეზი ის იყო, რომ გერმანია უკრაინას არ ეხმარება ისე, როგორც ამას ხალხი ითხოვს. იტალიაში, მეორე მსოფლიო ომის მერე, 94 მთავრობა გადადგა ვადაზე ადრე, 94-ჯერ იყო სამთავრობო კრიზისი და მარიო დრაგი თუ გადადგა, რაღა ეს იქნება განსაკუთრებული მოვლენა, გასაკვირი და უკრაინის ომთან კავშირში?  95-ე შემთხვევა იქნება და მორჩა. ტყულად ხარობს ის ხალხი, ვისაც ჰგონია, რომ ამ ქვეყნებში პოლიტიკური კრიზისები უკრაინის ომმა გამოიწვია და ახალი მთავრობები უკრაინას ძველებურად აღარ დაეხმარებიან. აქ მთავარი ბრიტანეთია, კონსერვატორები რჩებიან ხელისუფლებაში და ვინ შესცვლის ჯონსონს, ეს ბრიტანეთის რუსეთ-უკრაინის ომთან დამოკიდებულებას არ შეცვლის. მით უფრო, პრემიერ-მინისტრობის ერთ-ერთი კანდიდატი, საგარეო საქმეთა მინისტრი ლიზ ტრასია და ეს ქალი უფრო რადიკალურია რუსეთთან მიმართებაში, ვიდრე ჯონსონი. არც სხვა კანდიდატებს ეხატებათ გულზე რუსეთი. ევროპაში ეკონომიკური და სოციალური პრობლემები ამ ომმა კი არა, პანდემიამ გამოიწვია, ტრილიონები დაკარგა ევროკავშირმა, ხალხს შემოსავალი შეუმცირდა, ხარჯები გაეზარდა. ამით ოპოზიციური პარტიები სარგებლობენ და შედეგებიც სახეზეა. ცივილიზებულ, დემოკრატიულ სამყაროში ძალიან დიდია საზოგადოების მოთხოვნა, დაეხმარონ უკრაინას იმაზე მეტად, ვიდრე კონკრეტული ქვეყნები ეხმარებიან და ვიდრე ეს განწყობაა საზოგადოებაში, ვერავინ წავა ხალხის წინააღმდეგ, ვერც ერთი დემოკრატიული ქვეყნის მთავრობა ვერ შეაჩერებს ამ დახმარებას. ამერიკაშიც კი ეს ტენდენციაა. დონალდ ტრამპმა გამოაცხადა, რომ 2024 წლის არჩევნებში იყრის კენჭს. ტრამპმა განაცხადა, მე რომ ვყოფილიყავი პრეზიდენტი, უფრო მეტ დახმარებას გავუწევდი უკრაინას და მეტიც, რუსეთი ვერ გაბედავდა უკრაინაში ომის დაწყებასო.