„ჩამოგითვლით, რაშიც ივანიშვილმა ნამდვილად გადააჭარბა წინამორბედებს – სააკაშვილსა და შევარდნაძეს“ – ლაშა ჩხარტიშვილი

ლევან ჯავახიშვილი   

„ალიას“ ესაუბრება „ლეიბორისტული პარტიის“ ერთ-ერთი ლიდერი, ლაშა ჩხარტიშვილი.

-სააკაშვილის ხელისუფლების წარმომადგენლებმა, მცირე ნაწილმა მაინც აგო პასუხი ჩადენილ დანაშაულზე. ამათ, „ქართულ ოცნებას“ ორმაგად მოეთხოვებათ. რაც თავად ჩაიდინეს ისიც, და რაც დამნაშავე „ნაციონალებს“ აპატიეს პოლიტიკური გარიგებების თუ სხვა რაღაცების საფასურად, ისიც. უნდა დაესაჯათ დამნაშავეები, სამართლიანობა აღედგინათ და ამას ხალხი მოითხოვდა. მთავარი პრობლემა საქართველოში ყველა ტრაგედიის, ძარცვის, განადგურების, ქვეყნის მოსახლეობისგან დაცლისა არის ერთპიროვნული მმართველობა. მეტ-ნაკლები უარესობით, ვინ მეტი გააფუჭა და ვინ ნაკლები, ამას ვუყურებთ ამ 10 წლის განმავლობაში. „ნაცი“ უარესია თუ „ქოცი“? – ეს არის ივანიშვილის ძალაუფლების  შენარჩუნების ღერძი. იმაში კი არ ეჯიბრება „ნაცებს“, მათზე მეტი რა გააკეთა, იმაში ეჯიბრება, თვითონ მათზე ნაკლები გააფუჭა თუ არა. 10 კი არა, 30 წელია ამ რეჟიმში ვცხოვრობთ შევარდნაძისგან მოყოლებული. სახელმწიფოში ერთ პარტიას და ერთ ადამიანს როდესაც ეძლევა სრული ძალაუფლება, ეს კარგად არასდროს მთავრდება და ამიტომ ვართ ამ დღეში. ჩვენ არ გვყოლია არც ერთხელ დაბალანსებული პარლამენტი. საქართველოში ერთხელ მაინც უნდა მივაღწიოთ იმას, რომ ავირჩიოთ ისეთი პარლამენტი, სადაც საკონსტიტუციო კი არა, უბრალო უმრავლესობა არ ეყოლება არავის. იქნებ მერე კონსტიტუციაში შევიტანოთ ცვლილებები, რომ მომავალში, თუნდაც უმრავლესობის პირობებში, ერთმა პარტიამ ვერ დანიშნოს ქვეყნის მმართველად საკუთარი თავი, საკუთარი მაკონტროლებელი, საკუთარი  შემმოწმებელი და ყველაფერი ერთად. ადამიანები იდეალურები რომ იყვნენ და ძალაუფლების ცდუნებას უძლებდნენ, მაშინ აღარც კანონი იქნებოდა საჭირო და აღარც კონსტიტუცია. ჩვენ გვჭირდება სულ მცირე ერთხელ კოალიციური პარლამენტი, სადაც ერთ კაცს და მის ერთ პარტიას, არ  უნდა ჰქონდეს საშუალება, პარლამენტში ჰყავდეს პარლამენტის წევრთა რაოდენობის ნახევარზე  ერთი კაცით მეტი. ამას თუ ვერ მივაღწევთ, ჩვენ პროგრესი არ გვექნება.

ივანიშვილმა რაშიც გადააჭარბა ნამდვილად წინამორბედებს, ეს ღია დაპირისპირებაა დასავლეთთან. შევარდნაძე და სააკაშვილი დეკლარირების დონეზე მაინც მხარს  უჭერდნენ დასავლეთთან ინტეგრაციას. მეორე ეს არის კორუფციის მასშტაბი. კორუფცია მანამდეც იყო, მაგრამ ამ მასშტაბისა არა. ყველაზე მაღალი კორუფციული გაუმაძღრობა გამოავლინა ივანიშვილმა. დასავლეთთან ღია დაპირისპირებაში იმიტომ შევიდა, რომ ეშინია ევროპული ვალდებულებების აღებისა, მათი რეალიზაციისა და შემდეგ, ქვეყნის ევროკავშირის კანდიდატობისა თუ წევრობისა, რადგან მას შანსი აღარ ექნება ძალაუფლების შენარჩუნებისა. საარჩევნო სისტემის და სასამართლოს რეფორმა თუ მოხდინა, კარგავს ძალაუფლებას.  ჩათრევას ჩაყოლა სჯობიაო, შევახსენებ ივანიშვილს. საბოლოო ჯამში, დიდი ხნით ვერ დარჩება ხელისუფლებაში, ეს გამორიცხულია. შესაბამისად, რაც მეტს იფართხალებს, მეტად დაარღვევს კანონს და დააზიანებს საქართველოს ინტერესებს და მით უფრო მეტად მოეთხოვება პასუხი სამართლებრივად და პოლიტიკურად. ამას რაც უფრო ადრე გააცნობიერებს, მით უკეთესი მისთვის. ისე მაინც უნდა დათმოს ძალაუფლება, რომ შევარდნაძის ბედი არ გაუხდეს სანატრელი.