ჟურნალისტმა მირანდა ბაღათურიამ ქვეყანა დატოვა და ემიგრაციაში წავიდა. მისი თქმით, ამის მიზეზი 5 ივლისი გახდა, როცა მოძალადეები მის ოპერატორს, ლექსო ლაშქარავას თავს დაესხნენ. მაშინ ლექსომ ყველაფერი გააკეთა იმისთვის, რომ მირანდა გადარჩენილიყო. თვითონ მძიმედ დაშავდა და რამდენიმე დღეში გარდაიცვალა.
-ძალიან მძიმე წელი იყო ჩემთვის როგორც მენტალურად, ისე ფიზიკურად, ადამიანურად. სწორედ ამ მძიმე წლის დამსახურებაა, რომ ტაიმ აუტი ავიღე ამ პროფესიაში და წავედი საქართველოდან, მაგრამ არა იმიტომ, რომ გავექეცი მოვლენებს, არამედ იმიტომ, რომ 5 ივლისმა ეს შედეგი დააყენა ჩვენთვის, ჟურნალისტებისთვის, რომლებიც ჩვენს პროფესიულ მოვალეობას ვასრულებდით, – ისაუბრა მირანდამ ,,პირველი ხაზის” ეთერში.
5 ივლისის შემდეგ მირანდას ცხოვრება ცალკე აღარ არსებობს, მასთან ერთად მუდმივად არის ლექსო, რომელსაც ბევრ რამეს უმადლის. ჟურნალისტი რამდენიმე თვის წინ ,,სარკეს” თავის პროფესიულ არჩევანზე, ცხოვრებაზე უამბობდა:
– 5 წლიდან ჟურნალისტიკა მინდოდა. სახლში პირდაპირ გამოვაცხადე, რომ ჟურნალისტი უნდა ვყოფილიყავი. ბევრი წინააღმდეგობა და შრომა დამჭირდა, რომ აქამდე მოვსულიყავი.
6 წლის განმავლობაში მოვლენების ეპიცენტრში ვარ _ აქციები, სპეცოპერაციები, კრიმინალური გარჩევები… თითქმის ყველაფრის გაშუქება მომიწია. ყარაბაღშიც ვარ ნამყოფი. არა მარტო პროფესიაში, რეალურ ცხოვრებაშიც არასდროს არაფრის შემშინებია, ჟურნალისტიკაში კი ეს შიში საბოლოოდ გამიქრა.
_ მაყურებელს კარგად ახსოვს ის ემოციები, რასაც ოპერატორ ლექსო ლაშქარავას გარდაცვალების შემდეგ გამოხატავდით. ამ გადმოსახედიდან როგორ გაიხსენებთ მეგობარს და იმ ტრაგიკულ დღეს.
_ ლექსო ის ადამიანია, რომელიც მთელი ცხოვრების განმავლობაში ჩემთან იქნება. ჩვენ ერთი ემოცია და ტრავმა გადავიტანეთ. ყველაზე ახლო ადამიანები გავხდით. მისი გარდაცვალების შემდეგ თითქოს მარტო ვარ იმ განცდებთან და ტკივილთან, რაც 5 ივლისს უკავშირდება. ტრაგედია, რომელიც ჩემს ცხოვრებაში დატრიალდა, მთრგუნავდა, მაგრამ ახლა მაძლიერებს, ახლა ლექსო მაძლიერებს და მახსენებს, რომ უნდა ვიბრძოლო მისთვის და მომავალი ჟურნალისტებისთვის.
ლექსო საოცარი ადამიანი იყო და კვალი დატოვა ამ პროფესიაში. ვამაყობ, რომ ვიცნობდი და ვამაყობ, რომ მე ვიყავი მის გვერდით. 5 ივლისს აღარ ვიხსენებ, რადგან ისედაც სულ ჩემთან არის. უბრალოდ ვაგრძელებ ამ პასუხისმგებლობით ცხოვრებას, თუმცა ეს არ გახდა ჩემთვის ტვირთი. ტვირთი ვერ იქნება ლექსოს ტრაგედია, ჩემთვის ეს მოტივაცია და უდიდესი პასუხისმგებლობაა.
კომენტარები