ლევან ჯავახიშვილი
„ალიას“ ირაკლი ღარიბაშვილის საპარლამენტო გამოსვლაზე ესაუბრება პოლიტიკური მოძრაობა „ტრიბუნას“ დამფუძნებელი, დავით ჭიჭინაძე.
– პრემიერმა იგივე შესთავაზა ქართველ ხალხს, რასაც ადრე სთავაზობდა. მიუხედავად იმისა, რომ 20 ივნისს დაინახა ქართველი ხალხი რისთვის იყო გამზადებული და როგორ უყურებს ქვეყნის მომავალს, მას უნდა ცვლილებები და ეს გამოსულმა ხალხმა დაადასტურა. „ქართული ოცნება“ ამას ვერ ხვდება და რასაც 2012 წელს სთავაზობდა ხალხს – „ნაცმოძრაობის“ შეცვლას, ახლაც იმას სთავაზობს. 2022 წელია და ისევ „ნაცმოძრაობას“ ებრძვის და არა ქვეყნის ახალ გამოწვევებს, ანუ ცდილობს წარსულით აცხოვროს ხალხი და არანაირი უკეთესი მომავალი არ შესთავაზოს. ეს არის ყველაზე დიდი უბედურება. ხელისუფლებისთვის ყველაზე დიდი კრახი ის არის, რომ მათ გეგმა არ გააჩნიათ, სამომავლო გეგმა არ აქვთ, როგორ განავითარონ ქვეყანა. ეს როცა აღარ გაგაჩნია, რაც უნდა ფსევდო ღირებულებები შესთავაზო ხალხს, ვეღარ მოატყუებ. ამ ადამიანებმა უკვე იციან ჩამოყალიბებულად -ასე ცხოვრება აღარ შეიძლება! ჩვენი მოსახლეობის უმეტესობა გარბის ამ ქვეყნიდან. ეს პროცესი უნდა შევაჩეროთ. ეს არის ქვეყნის წინაშე ჩადენილი უდიდესი დანაშაული, რომელსაც სჩადის „ქართული ოცნება“. ამას აკეთებს ხალხის დაშინებით, თუ მე არ ვიქნები, თქვენ კიდევ უარესი გელით, რევანშისტული „ნაცმოძრაობა“ დაბრუნდება და ყველა თქვენგანზე შურს იძიებსო. აი, ეს არის მთელი მათი ნარატივი ამდენი ხნის განმავლობაში, 10 წლის განმავლობაში. არ შეიძლება საკუთარ ხალხს სულ შიშზე ელაპარაკებოდე. ეს არასწორია და საბოლოო ჯამში, ესენი გამოდიან ყველაზე მშიშრები. იმიტომ, რომ თუ ხელისუფლებას დაკარგავენ, ამ ქვეყანაში აღარ დაედგომებათ. აი, ამ მიმართულებებით არ შეიძლება მართო ქვეყანა და შესაბამისად, ჩვენ უკვე მივალთ იმ მომენტამდე, რომ არანაირ სამოქმედო ველს აღარ დაგვიტოვებს „ქართული ოცნება“ გარდა იმისა, რომ ამ ქვეყანაში დაიწყოს საყოველთაო დაუმორჩილებლობა, რომელიც გაჟღერებული იყო 20 ივნისის მიტინგზე. ყველაფერს აკეთებენ, რომ აბსოლუტურად შეეწინააღმდეგონ იმ მოთხოვნებს, რომლებიც წაგვიყენეს ჩვენმა პარტნიორმა სახელმწიფოებმა.
კომენტარები