დღეს სოციალურ ქსელში ვიდეო გავრცელდა, სადაც ჩანს, ცალ ხელში ღვინის ჭიქით და მეორე ხელში ავტომატური იარაღით შეიარაღებული ადამიანი, როგორ ისვრის ჰაერში – ტელეკომპანია “ფორმულას” ინფორმაციით, ვიდეო გადაღებულია საქართველოში, მცხეთაში, რესტორანი მარანი ჰოლში, კაცი რომელიც ავტომატური იარაღიდან ჰაერში დაახლოებით 30-ჯერ ისვრის – კონსტანტინე ნატროშვილია. ვიდეოში კიდევ ჩანს შეიარაღებული პირები.
ამავე ვიდეოში ჩანს ჟურნალისტ სალომე გოგიაშვილის ქმარიც.
“მეც ვიყავი იქ, კი, ბატონო” – ადასტურებს რესტორნაში ყოფნას მეუღლესთან ერთად სალომე გოგიაშვილი, თუმცა, ამტკიცებს, რომ სროლის ფაქტს არ შესწრებია და არც მეუღლეს მოუყოლია მომხდარზე.
მიუხედავად იმისა, რომ შემთხვევა ორი დღის წინ მოხდა, გომელაურის უწყებამ გამოძიება დაიწყო დღეს, მას შემდეგ, რაც ვიდეოთი მედია დაინტერესდა – მედიის ცნობით, საქმე აღძრულია ორი მუხლით – ცეცხლსასროლი იარაღის უკანონო შეძენა-შენახვა და ხულიგნობა.
აღმოჩნდა, რომ რესტორნის არც ერთ სტუმარს პოლიციისთვის არ მიუმართავს, არც რესტორნის დაცვას, არც პერსონალს. რესტორნის დაცვას პრობლემას უქმნის რესტორნის წინ გაჩერებული ჟურნალისტების მანქანა და მიკროფონი, თუმცა, როგორც ჩანს, პრობლემას არ უქმნის რესტორანში ავტომატით შესული ადამიანები და სროლა რესტორნის ტერიტორიაზე.
კომენტარები