“ივანიშვილის საყრდენი 5 ბიზნესმენი – ესენიც უნდა მოხვდნენ სანქცირებულთა სიაში” – ვის გვარებს ასახელებს ხოშტარია

პარტია “დროას” ლიდერი, ელენე ხოშტარია საქართველოსთან დაკავშირებით ევროპარლამენტის მიერ მიღებული რეზოლუციაზე საუბრისას, ამბობს:

პირდაპირ წერია, რომ ბიძინა ივანიშვილს აქვს დამანგრეველი დესტრუქციული როლი როგორც პოლიტიკაში, ასევე ეკონომიკაში და საგანგაშოა მისი ბიზნესკავშირები კრემლთან. აქედან გამომდინარე, ჩვენი ამოცანა დღეს არის, დავანგრიოთ ის ოლიგარქიული პირამიდა, ქსელი, რომელზეც დგას ეს ოლიგარქიული მმართველობა. ვაპირებთ პარტნიორებთან ვიმუშაოთ და ვამხილოთ ის საყრდენი ოლიგარქიული პირამიდის, რომლის მეშვეობითაც, ბიძინა ივანიშვილი ახერხებს ჩვენი ქვეყნის ინტერესების დაზიანებას.

დღეს მინდა ჩამოვთვალო ის პირველი ჯგუფი ე.წ. ბიზნესმენების და რეალურად, ოლიგარქის საყრდენების თავისი რუსული კავშირებით, რომლის გარეშეც ბიძინა ივანიშვილი ვერ შეძლებდა თავისი დესტრუქციული ამოცანების შესრულებას. სანქციების სიაში ასევე უნდა მოხვდეს:

დავით ხიდაშელი – ეს არის ადამიანი, რომელიც ბოლო დროს სარგებლობს დიდი პოლიტიკური და ეკონომიკური შეღავათებით საქართველოში, რომელიც მონაწილეობდა არაერთ რუსულ სპეცოპერაციაში, არის პირდაპირ დაახლოებული კრემლთან, ევტუშენკოვთან, რომელმაც ცოტა ხნის წინ ბიძინა ივანიშვილს დაურეკა და ბიზნეს გარიგებებზე ე საუბრობდნენ.

უჩა მამაცაშვილი – გარდა იმისა, რომ ის არის პრაქტიკულად ჩრდილოვანი მმართველი ეკონომიკის, აკონტროლებს კრიტიკულ ინფრასტრუქტურას, ის ბიძინა ივანიშვილთან ერთად არის სანქცირებული პოლტარჩენკოს ბიზნესპარტნიორი. ეს არის სანქტ-პეტერბურგის ყოფილი მერი, კრემლთან დაახლოებული პირი.

ვანო ჩხარტიშვილი – ის მონაწილეობს არაერთ კორუფციულ გარიგებაში, მათ შორის თამბაქოს სფეროში და ის არის ღიად ფოთში რუსული სახელმწიფო კომპანიის “როსნეფტის” პარტნიორი. 49%-ს მის კომპანიაში ფლობს “როსნეფტი”.

ოთარ ფარცხალაძე – ყველასთვის ცნობილი, პრაქტიკულად მაფიოზად ჩამოყალიბებული „ბიზნესმენი“, რომელიც გარდა იმისა, რომ მონაწილეობს კორუფციულ სქემებში, აკონტროლებს პროკურატურას და ფინანსურ პოლიციას.

ირაკლი რუხაძე – გარდა იმისა, რომ აკონტროლებს საბანკო სექტორს და ხელისუფლების პროპაგანდისტულ მედიას, კერძოდ „იმედს“, ჯდს და მაესტროს, ის ღიად ეწინააღმდეგება მათ შორის სანქციების რეალიზებას, მათ შორის საბანკო სექტორში და ისიც არის ერთ-ერთი ჰიბრიდული ოლიგარქიული მმართველობის საყრდენი”