ლევან ჯავახიშვილი
„ალიას“ ესაუბრება იურისტი, ვალერი გელბახიანი.
– ბატონო ვალერი, ხელისუფლების ბოლოდროინდელი ქმედებები ჩემში უკვე ეჭვს არ იწვევს, რომ ყველაფერს აკეთებენ, ევროკავშირის წევრობის კანდიდატობის სტატუსი არ მიიღოს საქართველომ. თქვენ რას ფიქრობთ?
– რა არის, იცით? ლოგიკა ლოგიკაა და შთაბეჭდილებაც ეგეთია. არ აქტიურობს ხელისუფლება, ეს ფაქტია. ან იმედი არ აქვს თავისი აქტიურობის შედეგისა, ან რუსეთის სახელმწიფო ინტერესებს უწევს ანგარიშს, ანდა არ სურს რეფორმების გატარება და ამ პირობებში ურჩევნია არსებობა. ამ სამიდან ერთ-ერთია, ასე მგონია. „ქართული ოცნების“ ლიდერების შეტევებს რომ ვუკვირდები დასავლეთზე, თუნდაც ბოლო შეტევას ამერიკის შეერთებულ შტატებზე, მოსამართლე ლაშა ჩხიკვაძე რატომ არ გაუშვეს ამერიკაში და ამერიკის საელჩოს თუ ელჩს, სისხლის სამართლის დანაშაულში ადანაშაულებ, ეს უკვე ნიშნავს, რომ ულტიმატუმის ენით ელაპარაკებიან ამერიკას.
– თეა წულუკიანისა და ირაკლი კობახიძის შეურაცხმყოფელი განცხადებებიც გავიხსენოთ, გავლენიან ევროპარლამენტართა მიმართ. რას ემსახურება ეს ტონი?
– კი, ეს შეტევები შემთხვევითი არ არის. ამგვარ შეტევებს და ასეთ რიტორიკას ამერიკას, რუსეთი და რუსი პოლიტიკოსები ვერ ბედავდნენ უკრაინაში ომის დაწყებამდე, ვიდრე ასე ღიად დაუპირისპირდებოდნენ. ახლა კი ამოიდგეს ენა. ლოგიკას დავაკვირდეთ. რამ უნდა გაათავხედოს საქართველოს უმწეო ხელისუფლება, რომ ამერიკას ულტიმატუმის ენით ელაპარაკოს? იმ სახელმწიფოს, რომელიც არის საერთაშორისო პოლიტიკის თამაშების წესების განმსაზღვრელია? ვფიქრობ, ერთადერთი გზა აქვთ დარჩენილი, კედელთან არიან და ცდილობენ, ხელისუფლება ამ გზით შეინარჩუნონ, ან კიდევ, მაღალი ხარისხის მონობაა, ვიღაც სულელს უჯერებენ, ასრულებენ მათ მითითებებს და საკუთარი ქვეყანა და ქვეყნის ინტერესები არაფრად მიაჩნიათ.
– ეს სულელი ვინ უნდა იყოს, რუსეთის ხელისუფლების მაღალი დონის წარმომადგენლის გარდა, ვისგანაც სამოქმედო გეგმებს და დირექტივებს იღებენ? დამატებითი ფაქტორი კი, ვფიქრობ, ბიძინა ივანიშვილის რუსეთში არსებული და სხვების სახელზე გადაფორმებული ბიზნესებია, რომელთაც რუსეთთან დაპირისპირების შემთხვევაში საფრთხე შეექმნება. ასეა?
– ცხადია, არც ივანიშვილის რუსული ბიზნესები გამოირიცხება. ვიღაცას რომ უსმენენ, ცხადია. მე რომ არ მისმენენ, ეს კი ვიცი. ის ვიღაც, ვისაც ესენი უსმენენ, ისიც ვიღაცის დავალებას ასრულებს და ჯამში დეგენერატობაა, აბა, რა არის?
– დავუშვათ და არ მოგვცეს ევროკავშირის წევრობის კანდიდატობის სტატუსი. მერე რა მოხდება?
– დავუშვათ კი არა, არ მოგცემენ. ვინ ხარ, ევროკავშირმა რატომ უნდა გაგიწიოს ანგარიში? რა გაქვს? ოქრო გაქვს, ნავთობი გაქვს, უახლესი თანამედროვე ტექნოლოგიები გაქვს, რომელიც ევროპას არ გააჩნია? რითი დააინტერესებ ევროპას? არც არაფრით. ვალი კი არ აქვს იმ ევროპას შენი? რატომ აგიკიდებს ზურგზე, რატომ გათრევს და რატომ მოგცემს ევროკავშირის ბიუჯეტიდან, მისი საფინანსო ინსტიტუტებიდან ფულს? საკუთარ მოსახლეობას დააკლონ, შენ მოგცენ და ფლანგო მათი ფულები? რატომ გაგიხსნის ევროკავშირი სრულად ბაზარს? რა გაქვს ევროკავშირის სტანდარტების? ჩამკვდარია მთელი მრეწველობა. ასე არ არის.
– ახლა გამოჩნდა, რომ ვიზალიბერალიზაცია და უვიზო მიმოსვლაც იმიტომ მოგვცეს, რომ ელოდნენ, რეფორმებს გაატარებდა ხელისუფლება და ევროპას უფრო დაუახლოვდებოდა და არა რუსეთს. თქვენ რას ფიქრობთ?
– კი, ბატონო, ეს იყო წახალისება და ამ წახალისებამ ხელ-ფეხი უფრო გაუხსნა საქართველოში ავტორიტარიზმს. შეიძლება, ამასაც ნანობენ, არათუ ევროკავშირის კანდიდატი ქვეყანა გაგვხადონ, უფრო წინ წაგვწიონ.
– უვიზო მიმოსვლა რომ შეგვიჩერონ, რა მოხდება? რა ბედი ელით ევროპაში სამუშაოდ წასულ ქართველებს ანდაც წასასვლელად გამზადებულებს?
– უკვე იმდენი ხალხია გასული საქართველოდან ევროკავშირისა და სხვა ქვეყნებში, სამუშაო ძალა აღარ არის ქვეყანაში, შრომისუნარიანი მოსახლეობის უდიდესი ნაწილი წავიდა. დარჩა მცირე პროცენტი და ისიც გაქცევას ლამობს. ქალია თუ კაცია, ყველა გარბის ქვეყნიდან. თუ შეგვიჩერეს ვიზალიბერალიზაცია, ბევრი არაფერი შეიცვლება. ამ პერიოდში, უვიზო მიმოსვლის პერიოდში, ფაქტიურად, ყველამ ისარგებლა ამით, ყველა გაიქცა, ვინც გამქცევი იყო. ამერიკა ევროპა არ არის, მაგრამ ბრუკლინში, რომელიც თბილისის ხელააა, იქაც კი, ქუჩაში იმდენ ქართულ ლაპარაკს გაიგებ, საქართველოში გეგონება თავი, იმდენი არიან ქართველები. საბერძნეთი, იტალია, გერმანია, საფრანგეთი, ბელგია სავსეა ქართველებით. კი, მერე გაუჭირდება ხალხის ნაწილს წასვლა, თუ უვიზო რეჟიმი შეგვიჩერეს, მაგრამ ეს არ იქნება ხალხის დიდი ნაწილი.
– ბატონო ვალერი, უვიზო რეჟიმის შეჩერების შემთხვევაში, ხალხს ვიზებთან დაკავშირებით პრობლემები შეექმნება, დეპორტაციას გაუკეთებენ ქართველებს და ეტყვიან, ჩადით საქართველოში, აიღეთ ვიზები და მერე ვიზით დაბრუნდით უკანო. პროცედურულად, ასე არ ხდება?
– ხალხია ჩასული ევროკავშირის ქვეყნებში და მათ აქვთ შრომითი ვიზები, ან სხვა სტატუსი, რის მეშვეობითაც ქვეყანაში დროებით ცხოვრების და მუშაობის უფლება აქვთ. მათ ხელს ვერ ახლებენ.
– კი, ნაწილს აქვს ეგ პრივილეგიები, მაგრამ უდიდესი ნაწილი არალეგალურად მუშაობს. ამ ხალხს გააჩერებენ? გეხსომებათ, ადრე როგორც იყო. მისცემდნენ კონკრეტული ქვეყნების საელჩოები 3, 6, 12 თვიან ვიზებს და ამ ვადის გასვლის შემდეგ, უნდა დაბრუნებულიყვნენ საქართვლოში. ზოგი ბრუნდებოდა, ზოგი უკანონოდ, უვიზოდ რჩებოდა და არალეგალურ მდგომარეობაში გადადიოდნენ. შესაბამისად, დეპორტაციის საფრთხე ემუქრებოდათ. იგივე დრო დაბრუნდება?
– თუ უვიზო რეჟიმი გაგვიუქმეს, მაშინ სავიზო რეჟიმი ამოქმედდება ევროკავშირის ქვეყნებში, ეგ თავისთავად მოხდება. კი, ვიღაცას შეეხება დეპორტაცია, მაგრამ არ მგონია, ბევრი გამოუშვან საქართველოში. ევროპის ბევრ ქვეყანას, თუ დანაშული არ ჩაიდინე, არ აქვს დეპორტაცია. ასეთ ქვეყნებში მოიყრიან თავს ქართველი ემიგრანტები და ცხადია, მარტო ქართველები არა. იქნებიან არალეგალები,მაგრამ დეპორტაციას არ დაექვემდებარებიან.
კომენტარები