ნიკა გვარამიას სასამართლომ 3 წლითა და 6 თვით პატიმრობა მიუსაჯა. უკვე კეთდება პირველი შეფასებები. “მთავარი არხის” ჟურნალისტის გიორგი გაბუნიას თქმით, ბრძოლა გაგრძელდება და არხიც ჩვეულ რეჟიმში გააგრძელებს მაუწყებლობას.
“ჩვენ ვაგრძელებთ ბრძოლას, უფრო მეტად ვიდრე აქამდე, რადგან დამატებითი მიზეზი გვაქვს იმისთვის, რომ ვიბრძოლოთ ბოლომდე თავისუფლებისთვის, როგორც ყოველთვის და არა მარტო ნიკას თავისუფლებისთვის. სახელმწიფომ ასე ქნა, ასე მოინდომა “ქართულმა ოცნებამ” და ნიკა გვარამია გახადა სწორედ ქვეყნის თავისუფლების კიდევ ერთ სიმბოლოდ და არა ერთადერთად, სამწუხაროდ. ნიკა არ არის ერთადერთი, მაგრამ ჩვენთვის არის ძალიან მნიშვნელოვანი სიმბოლო, რომელთან ერთადაც ჩვენ ამდენი წელი გავატარეთ ამ ყველაზე ძვირფასი მონაპოვარისთვის, თავისუფლებისთვის ბრძოლისთვის. ეს ბრძოლა აუცილებლად გაგრძელდება და არ იქნება მარტივი. მაგრამ “მთავარი არხი,” ნიკა გვარამიას მთავარი ქმნილება გააგრძელებს ჩვეულებრივად მუშაობას, ჩვენ ყველას შეგვიძლია აწყობილი საათივით მუშაობა.
ბრძოლა გრძელდება იმისათვის, რომ საქართველო იქცეს ისევ სახელმწიფოდ, ისე როგორც ოდესღაც იყო,” – განაცხდა გიორგი გაბუნიამ.
ცნობისთვის, “მთავარი არხის” დამფუძნებელი ნიკა გვარამია და მასთან ერთად ბრალდებული კახაბერ დამენია სასამართლომ დამნაშავედ ცნო, ზურაბ იაშვილი კი უდანაშაულოდ აღიარა.
ნიკა გვარამია სასამართლომ ნაწილობრივ დამნაშავედ ცნო, მოსამართლემ მის მიმართ წარდგენილი მუხლების ნაწილი 220-ე მუხლით გადააკვალიფიცირა და მას სასჯელის სახით 3 წელი და 6 თვე განესაზღვრა.
ზურაბ იაშვილი სისხლის სამართლის კოდექსის 221-ე და 322-ე მუხლებით უდანაშაულოდ იქნა ცნობილი. კახა დამენიას მიმართ სისხლის სამართლის კოდექსის 182-ე მუხლი, 220-ე მუხლით გადაკვალიფიცირდა და მას ჯარიმად 50 000 ლარი დაეკისრა.
კომენტარები