ფინეთი ნატო-ში გაწევრიანების განაცხადს ოფიციალურად გააკეთებს, – ამის შესახებ ფინეთის პრეზიდენტმა საული ნიინისტომ ქვეყნის პრემიერ-მინისტრ სანა მარინთან ერთად გამართულ პრესკონფერენციაზე განაცხადა.
„ეს არის ისტორიული დღე. ახალი ერა დაიწყო“, – აღნიშნა ნიინისტომ პრესკონფერენციაზე.
ფინეთის პრემიერ-მინისტრის თქმით, მათი ინტერესია, რომ რატიფიკაციის პროცესი შეძლებისდაგვარად მოკლე დროში და შეუფერხებლად წარიმართოს.
„სწორედ ამიტომ ჩვენ გვქონდა დისკუსიები ნატო-ს ბევრ წევრ ქვეყანასთან ჩვენს პროცესთან დაკავშირებით. ასევე, ნატო-ში გაწევრიანების შესაძლებლობებზე. ჩვენ გვექნება ეს დისკუსიები მომდევნო თვეების განმავლობაში იმაში დასარწმუნებლად, რომ პროცესი სწრაფი და შეუფერხებელი იყოს. ჩვენ არ გვქონია რაიმე ნიშანი ნატო-ში, რომ იქნება რაიმე სახის პრობლემები ფინეთის ან შვედეთის წევრობისთვის ალიანსში. ჩვენ გვაქვს ყველა შესაძლებლობა. ჩვენ უკვე ვართ ურთიერთდაკავშირებული ნატო-სთან და ვართ ნატო-ს ახლო პარტნიორები. ვნახეთ განცხადებები, რომ ჯერ კიდევ არის ზოგიერთი შეკითხვა, მაგრამ მნიშვნელოვანია, გვქონდეს დისკუსიები ქვეყნებთან, მინისტრებთან და ლიდერებთან, რომ განვიხილოთ ყველა არსებული საკითხი. არ ვფიქრობ, რომ პრობლემები იქნება, მაგრამ ასევე ჩვენი ინტერესია, პროცესი სწრაფად წარიმართოს“, – განაცხადა სანა მარინმა.
„ევრონიუსის“ ინფორმაციით, ფინეთის პარლამენტი, სავარაუდოდ, უახლოეს დღეებში დაამტკიცებს გადაწყვეტილებას. ამის შემდეგ, სავარაუდოდ, მომავალ კვირას, წევრობის ოფიციალური განაცხადი წარედგინება ნატო-ს შტაბ-ბინას ბრიუსელში.
კომენტარები