„აი, ამიტომ არის ნატო ასეთი მოწადინებული, რომ რუსეთი უკრაინაში გააჩეროს“ – სოსო ცინცაძე

ლევან ჯავახიშვილი

„ალიას“ ესაუბრება ექსპერტი, სოსო ცინცაძე.

– ბატონო სოსო, ამერიკამ, დიდმა ბრიტანეთმა და ნატო–ს წევრმა სხვა ქვეყნებმა, უკრაინას  ბევრი იარაღი მიაწოდეს, მათ შორის, მძიმე  და შეტევითი საშუალებები – თვითმფრინავები, ჰაუბიცები, საჰაერო თავდაცვითი სისტემები. ახლა უკრაინელი ჯარისკაცები ნატო–ს სამხედრო ბაზებზე ამ იარაღს ითვისებენ. ნატო ამაზე გაჩერებას არ აპირებს  და უფრო თანამედროვე და ლეტალური იარაღის მიცემას ჰპირდება უკრაინას.  ამერიკის თავდაცვის მინისტრი, ლოიდ ოსტინი აცხადებს, უკრაინა ამ ომს არ  წააგებს, ჩვენ უკრაინას არ მივატოვებთ და  რა სახის იარაღიც დასჭირდება, ყველაფერს მივცემთო. იქით დიდი ბრიტანეთის პრემიერ–მინისტრმა, ბორის ჯონსონმა, რუსეთის მხრიდან ბირთვული შანტაჟის  საპასუხოდ განაცხადა, ბრიტანეთი ნატო–სთან კონსულტაციის გარეშე გამოიყენებს ბირთვულ იარაღს რუსეთის წინააღმდეგ, თუ საჭირო გახდებაო. ამასობაში, ამერიკის კონგრესმა „ლენდ ლიზის“ პროგრამა დაუმტკიცა ჯო ბაიდენს და ამერიკა შეუზღუდავად გადასცემს  სხვადასხვა სახის იარაღს უკრაინას. ვითარება ძალიან იძაბება და უკვე ბევრი ამბობს, რომ ნატო ჩაერთვება ომში და რუსეთს დაარტყამს. ეს რამდენად მოსალოდნელია?

– პრაქტიკულად, ნატო უკვე ომობს რუსეთთან, ოღონდ, ჯერჯერობით, მინდობილობით. ანუ ნატო–ს, ამერიკისა და დიდი ბრიტანეთის  მინდობილობით, უკრაინა ომობს. სიტუაცია გაირკვეა ორ–სამ კვირაში. ამ პერიოდში უკვე გარდატეხა მოხდება. თუ რუსეთმა მოახერხა და წინ წაიწია, ხარკოვი აიღო, მარიუპოლის ბედი თითქმის გადაწყვეტილია, აღებული აქვს, ლუგანსკისა და დონეცკის სრულად გაკონტროლებაც თუ შესძლო, მაშინ მკვეთრად შეიცვლება სიტუაცია. ასეთ შემთხვევაში, თვითმფრინავების მიწოდებაღა დარჩება ნატო–ს უკრაინისთვის. ამ ეტაპზე, დაშლილ თვითმფრინავებს აწვდიან და უკრაინაში აწყობენ. კი, ძველი,  საბჭოთა თვითმფრინავებიც მისცეს, მაგრამ ეგენი ნაკლებეფექტურია, ადვილად ჩამოაგდებენ რუსები. ეს ჰაუბიცები და ტანკები რომ მისცეს, ეს კარგია. „ლენდ ლიზის“ დამტკიცება  კი, ვფიქრობ, კარდინალურად შესცვლის ომის მიმდინარეობას. რაც ჩამოთვალე, მაგას დიდი ბრიტანეთის საგარეო საქმეთა მინისტრის, ლიზ ტრასის განცხადებას დავამატებ, რომ ყველაფერია მოსალოდნელი და ჩვენ ყველაფერი უნდა გავაკეთოთ, რომ უკრაინამ  გაიმარჯვოსო. არ გამოვრიცხავ არაფერს. შესაძლოა, ნატო–რუსეთის  ცხელი ომიც დაიწყოს, რომელიც რაღაც ფორმით უკვე დაწყებულია. ჩვენს ტელევიზიებს რომ ვუყუროთ და ვუსმინოთ, ლამის უკვე ზეიმობენ უკრაინის გამარჯვებას. აცხადებენ, რომ უკრაინის გამარჯვებაში ეჭვი აღარ გვეპარებაო. კი, ამერიკის თავდაცვის მინისტრი ამბობს, ჩვენ ყველაფერი უნდა გავაკეთოთ, რომ უკრაინამ გაიმარჯვოსო. ე.ი. დარწმუნებული არ არის, რომ გაიმარჯვებს. ბრიტანეთის თავდაცვის მინისტრიც არ არის დარწმუნებული, რომ უკრაინა იმარჯვებს. მარტო ჩვენი ტელევიზიების დიქტორები, მათი ჟურნალისტების  მიერ მოწვეული „ექსპერტები“ არიან დარწმუნებულნი უკრაინის გამარჯვებაში. ცხადია, უკრაინას აქვს დიდი შანსი, რომ გაიმარჯვოს, დიდი ალბათობით, მეც ასე მგონია, მაგრამ ახლა ხელაღებით, დაბეჯითებით ამას ვერ ვიტყვი. უკრაინამ  რუსეთთან ომი რომ მოიგოს, ნატო–მ ყველა სახის იარაღი უნდა გადასცეს უკრაინას, რაც გააჩნია, ატომური ბომბის გარდა. ახლა დიდი ფული დასჭირდება უკრაინას. ამერიკის ფინანსთა სამინისტროს დასკვნა გამოქვეყნდა, სადაც ნათქვამია, რომ ამ ეტაპზე, დანგრეული უკრაინის აღსადგენად 600 მილიარდი დოლარია საჭირო, ახლა კი, ომის პერიოდში, ჯარმა რომ იბრძოლოს, სახელმწიფომ იფუნქციონეროს და მშვიდობიან მოქალაქეებს, ვინც არ მუშობს, ვინც ამ დანგრეულ ქალაქებში იმყოფება, მათ საკვები და მედიკამენტები რომ არ მოაკლდეთ, ამისთვის თვეში 4–5 მილიარდი დოლარი სჭირდება. ეს პატარა თანხა არ არის. პრაქტიკულად, ეს არის მესამე მსოფლიო ომის ანონსი. თუ რუსეთმა უკრაინასთან ომში გაიმარჯვა, მესამე მსოფლიო ომი გარდაუვალი იქნება და თუ იქნება, მალე იქნება. შეიძლება, შენ კი არა, მეც მოვესწრო მესამე მსოფლიო ომს. აი, ამიტომ არის ნატო ასეთი მოწადინებული, რომ რუსეთი უკრაინაში გააჩეროს და დაამარცხოს. ლიზ ტრანსმა პირდაპირ განაცხადა, ღმერთმა ნუ ქნას, რომ რუსეთმა ეს ომი მოიგოს, მაშინ ჩვენ ევროპაში ჯოჯოხეთური ცხოვრება გვექნებაო. ნატო–ს  გენმდივანმა, იენს სტოლტენბერგმაც ღიად თქვა, რუსეთი თუ უკრაინაში არ დამარცხდა, მაშინ ევროპაში დიდი ომი იქნებაო. უკრაინაში გამარჯვებული რუსეთი არ გაჩერდება. არ ვიცი, შემდეგი პოლონეთი იქნება, ბალტიისპირეთის ქვეყნები თუ ევროპის სხვა ქვეყანა, სადღაც აუცილებლად შეიჭრება და ომს დაიწყებს. თან თუ რუსეთმა გაიმარჯვა, უკრაინა ვეღარაფერს მიიღებს და მერე ზოგიერთი ქვეყანაც არაფრად ჩააგდებს რუსეთისთვის დაწესებულ სანქციებს, იარაღსაც მიაწვდიან და ყველაფერს, რაც დასჭირდება. ჩინეთი, მაგალითად…