პარლამენტის თავმჯდომარე, შალვა პაპუაშვილი აცხადებს, რომ ივანიშვილისა და რუსი ოლიგარქის გუშინ გავრცელებული სატელეფონო ჩანაწერები მონტაჟია. მისი განცხადებით, ამ ჩანაწერების გავრცელების მიზანი ქვეყანაში არეულობა და საქართველოს ომში ჩათრევაა.
მისი აზრით, “ჭორის გამავრცელებელმა უნდა ამტკიცოს, რომ ჭორი სიმართლეა და არა პირიქით, ჭორის ადრესატმა”.
“ერთადერთი რასაც ეს კამპანია ადასტურებს არის ის, რაზეც ჩვენ დიდი ხანია ვსაუბრობთ, რომ მიმდინარეობს დეზინფორმაციული კამპანია საქართველოს წინააღმდეგ, იმისთვის, რათა მოხდეს არეულობა ქვეყანაში, რათა საქართველო ჩათრეულ იქნეს ომში. გუშინ პრინციპში, ყველაზე კარგი რაც იყო, ვიზუალურადაც ვიხილეთ როგორ მზადდება და როგორ ხდება განხორციელება ამ დეზინფორმაციული კამპანიის, ე.წ. ჩანაწერების ჩვენებით, რომელიც, შეუიარაღებელი თვალითაც და ყურითაც ჩანს, რომ არის მონტაჟი, მეორე როგორ ხდება ამაზე რეაქცია, შიგნიდან გარეთ ვინ არიან ამ ყველაფერში ჩართული. როგორ ხდება ამ თემის აქტუალიზირება პარტიის, შემდეგ “ნაციონალური მოძრაობის” ტელევიზიების მიერ, როგორ ხდება შემდეგ “ნაციონალური მოძრაობის” ახალგაზრდული ფრთის “სირცხვილიას” მიერ ამის უკვე ქვეყნის გარეთ გატანა, მთელი კონვეიერი არის. […] არაფერი მიუთითებს, რომ არის ავთენტიკური, მეორე, არანაირი ფაქტი, თუკი არის რაღაც საუბრები, ამას ფაქტებიც ხომ უნდა მოჰყვეს, არც ფაქტი არაფერი არაა”, – თქვა პაპუაშვილმა.
მისი განცხადებით, თუ ვინმეს რამე გამოსაძიებელი აქვს, ეს პარლამენტის კომპეტენციას არ წარმოადგენს.
“ქართული ოცნების” დამფუძნებლის, ბიძინა ივანიშვილისა და რუსი ოლიგარქის საუბრის ორი ჩანაწერი 25 აპრილს გავრცელდა. ჩანაწერში სანქცირებული რუსი ოლიგარქი ვლადიმერ ევტუშენკოვი ივანიშვილს ბიზნეს იდეით ურეკავს. ივანიშვილის პასუხებიდან კი იკვეთება, რომ თავადაც დაინტერესებულია ამ გარიგებით. ევტუშენკოვი კომპანია “სისტემას” მფლობელია, რომელიც სამხედრო დრონებს ამზადებს.
კომენტარები