“როგორ გულშემატკივრობ ქვეყანას, რომელიც აღდგომა დღეს ადამიანის მოკვლაზე და მასთან ერთად ღმერთის მოკვლაზე უარს არ ამბობს” – ჯეჯელავა

ანალიტიკოსი, ლელა ჯეჯელავა:

“მგონი კითხვები საერთოდ აღარ დარჩა, იმდენი სინათლეა უკვე დედამიწაზე. ყველა ჯურღმულში ჩანს რა იმალება, ყველა კარადიდან ჩონჩხები გადმოყრილია, ასე გამჭვირვალეები არასოდეს ვყოფილვართ. აბსოლუტური არც სიკეთეა და არც ბოროტება, ყველანი ისეთები ვართ, როგორებიც ვართ.

ზოგი ღმერთს ტაძარში ეძებს, ზოგი ცაში და ზოგი საკუთარ თავში, ესეც ნორმალურია.მაგრამ თუ ოდესმე ღმერთი გიძებნია, თუ ოდესმე მისთვის გაჭირვებაში ან დალხინებაში ერთხელ მაინც გულწრფელად დაგიძახია, მაშინ მითხარი, როგორ გულშემატკივრობ ან ეხმარები ქვეყანას, რომელიც აღდგომა დღეს ადამიანის მოკვლაზე და მასთან ერთად ღმერთის მოკვლაზე უარს არ ამბობს.

როგორ უნდა მოიხსენოთ აღდგომას ტაძრში მისულებმა რუსეთის პატრიარქი, როგორ უნდა ილოცოთ მისი სულისთვის, რომელიც საერთოდ არ აქვს. რომ ჰქონდეს, მაშინ ხომ წინ აღუდგებოდა მართლმადიდებლობის სახელით ჩვილი ბავშვების ხოცვას და წამებას. ის არ არის თქვენი ქრისტესმიერი ძმა, ის ვერასოდეს იქნება თქვენი თანაზიარი სიყვარულში, მაშ აღდგომა დღეს ტაძარში მისულებო, ნუ ჩაიზიარებთ ქრისტეში ბოროტებას, ნუ დააბნელებთ მზეს, ნუ მიაყენებთ ჩრდილს აღდგომის ნათელს, ნუ მისცემთ თქვენი ლოცვით ამ დღეს მაინც ბოროტებას ძალას. გაიხსენეთ, რომ როცა კირილეს ლოცვაში იხსენებთ, იმ წუთში ერთი სიცოცხლე ისპობა მისი სახელით, კიდევ ერთ ჭურჭელს უმსხვრევენ ღმერთს!