ვმუშაობთ იმაზე, რომ  უკრაინას იარაღი “უპრეცედენტო სიჩქარით” მივაწოდოთ – აშშ-ის თავდაცვის დეპარტამენტი

აშშ-ის თავდაცვის დეპარტამენტის წარმომადგენელი აცხადებს, რომ მუშაობენ, იმაზე, რომ  უკრაინას იარაღი “უპრეცედენტო სიჩქარით” მიაწოდონ.

რუსეთის მიერ უკრაინაში შეჭრის შემდეგ ბაიდენის ადმინისტრაციამ უკრაინას $2.3 მილიარდის სამხედრო დახმარება აღმოუჩინა, მიაწოდა მას იარაღი, ტყვია-წამალი და აღჭურვილობა. ასევე, იარაღის საყიდლად გამოყო 300 მილიონი დოლარი უკრაინის უსაფრთხოების დახმარების ინიციატივის ფარგლებში.

“ეს ყველაზე დიდი დახმარებაა, რაც აშშ-მ პარტნიორ ქვეყანას გაუწია”. – აცხადებს აშშ-ის თავდაცვის უწყების წარმომადგენელი.

მისივე თქმით, აშშ-ის სამხედრო მარაგებიდან აღჭურვილობის სხვა ქვეყნებში გადაზიდვის პროცესი, რომელსაც წარსულში კვირები ან თვეები სჭირდებოდა, ახლა შეიძლება 48-დან 72 საათამდე დასჭირდეს.

რუსეთმა აღმოსავლეთ უკრაინაზე შეტევები განაახლა. რუსეთის განცხადებით, ეს “სამხედრო ოპერაციის მეორე ფაზაა”. 19 აპრილს იბომბება აზოვსტალის ქარხანა მარიუპოლში, რომელშიც გამაგრებულები არიან მარიუპოლის მცველები – აზოვის ბატალიონი და 36-ე საზღვაო ქვეითი ბრიგადა, ასევე, მას თავს აფარებს 1000-მდე ბავშვი და მოხუცი.