უკრაინაში ვითარება ისევ დაძაბულია. დაიბომბა ლუჰანსკისა და დონეცკის ოლქები. დაღუპულია 2 ადამიანი. ღამით დაბომბვა გრძელდებოდა ხარკივის ოლქშიც, რის გამოც მასშტაბური ხანძარი გაჩნდა ერთ-ერთ ადმინისტრაციულ შენობაში. ოკუპანტებმა ცეცხლი გახსნეს ქალაქ ბარვინკოვეში. ბოლო 24 საათის განმავლობაში 4 ადამიანი დაიღუპა და 17 დაშავდა.
ჟიტომირის რეგიონში რუსებმა რაკეტა ესროლეს ინფრასტრუქტურულ ობიექტს. პარალელურად, ვრცელდება თანამგზავრიდან გადაღებული ახალი ფოტოები, სადაც ჩანს, რომ რუსეთი უკრაინის საზღვართან ახლოს, ბელგოროდის ოლქში, ჯარების მობილიზაციას ახდენს.
გენერალური პროკურორის მონაცემებით, ომს 191 ბავშვი ემსხვერპლა, 349 კი დაიჭრა.
“მტერი განაგრძობს სარაკეტო იერიშებს სამოქალაქო ინფრასტრუქტურაზე ხარკივისა და ზაპოროჟიის ოლქებში. აქტიურად ატარებს საჰაერო დაზვერვას. ოკუპანტები აგრძელებენ უკრაინაში ე.წ. მოხალისეების გაგზავნას. ისინი გაგზავნეს უკრაინაში 58-ე არმიის ერთ-ერთი ქვედანაყოფის გასაძლიერებლად. გრძელდება ქალაქ ხარკივის ნაწილობრივი ბლოკადა და საარტილერიო დაბომბვა. დონეცკისა და ტავრიას მიმართულებით მტერმა განაგრძო საჰაერო დარტყმები მარიუპოლზე. ის იწყებს შეტევას აზოვსტალის მეტალურგიულ კომპლექსთან და საზღვაო პორტთან,”-აცხადებს უკრაინის შეიარაღებული ძალების გენერალური შტაბის პრესსპიკერი ოლექსანდრ სტუპუნი.
პარალელურად, რუსეთის თავდაცვის სამინისტროს სპიკერი უკრაინელი სამხედროების ლიკვიდაციასა და ნებაყოფლობით ჩაბარებაზე ავრცელებს ინფორმაციას.
“მარიუპოლში, ილიჩის ქარხნის ტერიტორიაზე ალყაში მოქცეულმა უკრაინელმა ჯარებმა ქალაქიდან გაქცევა წარუმატებლად სცადეს. უკრაინელი სამხედროების ჯგუფი, 100-მდე ადამიანი ჯავშანტექნიკით ცდილობდა ქარხნის ტერიტორიიდან გასვლას და წასვლას ქალაქის ჩრდილოეთ მიმართულებით. ეს მცდელობა ჩაიშალა საჰაერო და საარტილერიო დარტყმებით. ლიკვიდირებულია 50-მდე სამხედრო მოსამსახურე . კიდევ 42 უკრაინელმა სამხედრომ ნებაყოფლობით დაყარა იარაღი და ჩაბარდა,”-აცხადებს იგორ კონაშენკოვი.
კომენტარები