12-კაციანი დანაყოფის მეთაური, გოჩა ხორავა, რომლის დანაყოფშიც გუშინ ოკუპანტების მიერ მოკლული ორი ქართველი სამხედრო მსახურობდა, “მთავარ არხს” მომხდარის დეტალებს უყვება.
ის ამბობს, რომ 18-საათიანი წარმატებული სპეცოპერაციიდან ბრუნდებოდნენ, რა დროსაც ოკუპანტებმა ხარკოვთან უთანასწორო თავდასხმა განახორციელეს. რუსები ხარკოვს დრონებით ბომბავდნენ, რასაც დავით მენაბდიშვილისა და ნიკა შანავას სიცოცხლე შეეწირა.
გოჩა ხორავას თქმით, ძალიან მძიმეა კიდევ ერთი ჯარისკაცის მდგომარეობა.
სულ დაჭრილია 5 ქართველი სამხედრო. ახლა დანაყოფი ხარკოვს ტოვებს და შედარებით მშვიდ ტერიტორიაზე გადადის.
“კონტაქტურზე მოვხვდით და წინააღმდეგობა რომ ვერ გაგვიწიეს, გამოიძახეს არტილერია და არტილერიამ დაგვბომბა. ერთ კაცზე მოდიოდა 20 ჭურვი. 7 კაცი კანტუზიანი გვაქვს. ბიჭები ახლა გადაგვყავს უსაფრთხო ჰოსპიტალში. 2 დაღუპული გვყავს ჩემი მაგარი მებრძოლები, გმირები, გმირულად დაეცნენ ჩვენი ბიჭები. ჩვენც გავაკეთეთ გასაკეთებელი, მაგრამ დაგვეღუპნენ. კარპატსკი სიტში ქართველი მებრძოლების მეთაური ვარ მე და ვამეხა ჩუთლაშვილი, ვამეხა ჩუთლაშვილი მძიმედაა. ომში ვართ ჩამოსულები და ეს არის საქართველოსა და უკრაინის ომი, მე ვთხოვ მთელ საქართველოს, ჩვენს ბიჭებს დახვდნენ როგორც საჭიროა ისე, გმირებს”, – ამბობს გოჩა ხორავა.
რუსების თავდასხმის დეტალებს იხსენებენ დანაყოფის სხვა წევრებიც:
“პოზიცია ჰქონდათ აღებული, დაკავებული ჰქონდათ ტერიტორია, სადაც ჰქონდათ სანგრები, დააფიქსირა მოწინააღმდეგის დრონმა და გადასცა კოორდინატები რუსულ არტილერიას, საიდანაც გაიხსნა ცეცხლი 150 მმ-იანი საარტილერიო სისტემებიდან. ნიკუშა სადაც იყო სანგარში 1 მეტრში დაეცა ეს 150 მმ-იანი ჭურვი და იგივე მანძილზე, 1 მეტრში დათოს სანგართან”.
“როდესაც პირველად საჰაერო თავდასხმა მოხდა და განგაშის სიგნალი ჩაირთო, ნიკუშა არბოდა ზევით და რომ ვკითხეთ სად მიდიხარ-მეთქი, ჩემი ძმა უნდა გავაღვიძოო და მაშინ მივხვდით, რა ვაჟკაცი ბიჭი იყო”.
შეგახსენებთ, რომ 9 აპრილს უკრაინაში, ოკუპანტთან ბრძოლას დავით მენაბდიშილი და ნიკა შანავა ემსხვერპლნენ. 49 წლის დავით მენაბდიშვილი გამოცდილი სამხედრო იყო. ის მსახურობდა მუხროვანის ბატალიონში და უკრაინაში 2014 წელს იბრძოდა. მენაბდიშვილი უკრაინაში ომის დაწყების მეორე დღესვე, 25 თებერვალს წავიდა. ხოლო 21 წლის ნიკა შანავა ფრონტის წინა ხაზზე ძმასთან ერთად იბრძოდა. ქართველი მებრძოლები უკრაინის ერთ-ერთ ყველაზე გამორჩეულ და ბატალიონში – კარპატსკა სიჩში ირიცხებოდნენ. ამ დროისთვის, ორივე გმირის ცხედარი პროზექტურაშია გადასვენებული.
საქართველოსა და უკრაინის საერთო მტრის წინააღმდეგ ბრძოლას უკვე 6 ქართველი ემსხვერპლა. დავით გობეჯიშვილი, გია ბერუაშვილი და დავით რატიანი საქართველოში უკვე გადმოასვენეს და სამხედრო პატივით დაკრძალეს, სამწუხაროდ ამ დრომდე ვერ ხერხდება ალყაში მოქცეული მარიუპოლიდან ბახვა ჩიქობავას ცხედრის გამოსვენება.
კომენტარები