“მეც უკრაინელი ვარ“ – ბუქარესტში რუსეთის საელჩოს ჭიშკარს მძღოლმა ავტომობილი გამიზნულად შეაჯახა. ინფორმაციას ტელეგრამი ავრცელებს.
ტელეკომპანია Digi24 წყაროზე დაყრდნობით იუწყება, რომ მძღოლი შეგნებულად მოქმედებდა. მას შემდეგ რაც მანქანა ჭიშკარს შეაჯახა, საელჩოს დაცვამ მძღოლს ტერიტორიის სასწრაფოდ დატოვება მოსთხოვა. საპასუხოდ ის რაღაცას ყვიროდა და მანქანას ცეცხლი წაუკიდა. მძღოლი მანქანაში გარდაიცვალა.
მედია იუწყება, რომ ავტომობილს “მამების უფლებების დაცვის ასოციაციის პრეზიდენტი” ბოგდან დრაგიჩი მართავდა. ერთი დღით ადრე სასამართლომ მას 15 წლით თავისუფლების აღკვეთა მიუსაჯა საკუთარ ქალიშვილზე სექსუალური ძალადობის ბრალდებით. განაჩენი ჯერ კიდევ არ იყო ძალაში შესული, ამიტომ დრაგიჩი თავისუფლებაში იმყოფებოდა.
4 აპრილს დრაგიჩმა ფეისბუქზე დაწერა პოსტი, სადაც ის საუბრობდა 2019 წელს კიევში მოგზაურობის შესახებ და ყველას მოუწოდებდა “იყავით უკრაინელები”.
შეგახსენებთ, რუსეთმა უკრაინაზე სრულმასშტაბიანი თავდასხმა 24 თებერვალს გამთენიისას, ერთდროულად რამდენიმე დიდი ქალაქის, მათ შორის, კიევის დაბომბვით დაიწყო.
პუტინის მიერ უკრაინისთვის ომის გამოცხადებას წინ უძღოდა დონეცკისა და ლუგანსკის თვითგამოცხადებული რესპუბლიკების მარიონეტული რეჟიმების ფორმალური თხოვნა კრემლისადმი, დახმარებოდნენ “უკრაინული აგრესიის” მოგერიებაში.
რუსეთის სამხედრო ძალები უკრაინას სხვადასხვა მიმართულებით უტევენ. პარალელურად, მსოფლიოს ქვეყნები რუსეთს სხვადასხვა სახის სანქციას უწესებენ.
კომენტარები