რისი უფლება აქვს /არ აქვს ფართის გამქირავებელს? – იურისტები შესაძლო რისკებზე საუბრობენ

მას შემდეგ, რაც რუსეთ-უკრაინის ომის დაიწყო და რუსეთის მისამართით მსოფლიომ სანქციები აამოქმედა, საქართველოში რუსეთისა და ბელარუსის მოქალაქეების მხრიდან უძრავ ქონებაზე მოთხოვნა გაიზარდა. საუბარია როგორც საცხოვრებელ, ისე კომერციულ ფართებზე. ამის მიღმა უძრავი ქონების ექსპერტები და იურისტები უკვე საუბრობენ რისკებზე. ეს კი ის რისკებია, რომელიც შესაძლოა სანქცირებული რუსეთის მოქალაქეების მხრიდან, ქვეყანაში უძრავი ქონების ქირავნობაზე მოთხოვნის გაზრდას მოჰყვეს.

იურისტების თქმით, დღეს არსებული კანონმდებლობით ფართების გამქირავებლები დაცულები არ არიან. იურისტი დავით კლდიაშვილი აცხადებს, რომ იმ შემთხვევაში თუ ბინის დამქირავებელი ქირის გადახდას ვერ შეძლებს ბინის მესაკუთრეს ბერკეტი არ აქვს კუთვნილი საკუთრება დაიბრუნოს.

კლდიაშვილის განმარტებით ეს პრაქტიკა 2015 წლის ბოლოდან მოქმედებს, იმ დროიდან როცა ქვეყანაში საპოლიციო გამოსახლება გაუქმდა. კლდიაშვილი მოქალაქეებს გირავნობის ხელშეკრულების გაფორმებას ურჩევენ, იმისთვის, რომ მათი პოზიციები სასამართლოში დაცული იყოს.

“სამწუხაროდ, აქამდე პრაქტიკა იყო ის, რომ კერძო პირებზე ფართების გაქირავება ძირითადად ხელშეკრულების გარეშე ხდებოდა. ისინი ზეპირსიტყვიერად თანხმდებოდნენ პირობებზე. ამ შემთხვევაში რეკომენდაცია იქნება ის, რომ  მათ ქირავნობის ხელშეკრულებაგააფორმონ, სადაც გაწერილი იქნება ვადები, ქირავნობის ღირებულება და ასევე ისიც, თუ რა შემთხვევაში ხდება ხელშეკრულების გაწყვეტა, მაგალითად თუ არ გადაიხდის ეს პირი ხელშეკრულებით გათვალისწინებულ თანხას”. – აცხადებს იურისტი დავით კლდიაშვილი.

MG LAW OFFICE მმართველი პარტნიორი და დამფუძნებელი არჩილ გიორგაძე კი აცხადებს, რომ დღეს ზუსტი გზა როგორ უნდა იყოს ფართის გამქირავებელი არსებული რისკებისგან დაცული არ არსებობს. მისი თქმით, იმ შემთხვევაში თუ ბინის მესაკუთრეს არაკეთილსინდისიერი გადამხდელი ბინიდან ვერ გამოჰყვას საქმე სასამართლომდე მიდის.

“ზუსტი მზა რეცეპტი როგორ შეიძლება ამ პროცესს ფართის მესაკუთრემ მოუაროს და რისკები დააზღვიოს ძალიან ცოტაა. ერთადერთი რაც მახსენდება, ის არის, რომ შეიძლება დავის მოგვარების მეთოდად არა სასამართლო, არამედ არბიტრაჟი აირჩიოს, იმ დაშვებით, რომ ამ შემთხვევაში დავა უფრო სწრაფად გადაწყდება, თუმცა აქაც არსებობს რისკები”. – აცხადებს კომპანია MG LAW OFFICE მმართველი პარტნიორი და დამფუძნებელი არჩილ გიორგაძე.

იურისტები საუბრობენ გაჭიანურებულ სასამართლო პროცესებზეც, რომელიც ხშირად წლობით გრძელდება. შესაბამისად, ფართების მესაკუთრეები კუთვნილი ქონების დაბრუნებას წლების განმავლობაში ვერ ახერხებენ.

“კანონში წერია, რომ მსგავსი პროცესების განხილვა 1-2 თვეში უნდა მოხდეს. როცა საპოლიციო გამოსახლება გაუქმდა მაშინაც ვამბობდით, რომ ეს იქნებოდა ჩანაწერი ჩანაწერისთვის. სამწუხაროთ, ყველა ჩვენი მოლოდინი ახდა და რეალურად 1-2 თვეში კი არა მინუმუმ წელიწადი მაინც სჭირდება იმას, რომ ამ პროცესმა შედეგი გვანახოს“. – ამბობს იურისტი დავით კლდიაშვილი.

ამასთან, მათი თქმით, პრობლემაა ასევე აღსრულების ნაწილიც , რომელიც ისედაც დროში გაჭიანურებული სასამართლო პროცესის შემდეგ ასევე დროში იწელება.

“სასამართლო პროცესი შეიძლება გაგრძელდეს მინიმუმ 2 წელი. თუმცა პრობლემაა ის, რომ პრობლემები აქ არ სრულდება. მაშინ როცა ფართის მფლობელი სასამართლოში მოიპოვებს აღსრულების ფურცელს, იწყება აღსრულების პროცედურა, რომელიც ასევე უკიდურესად ჯანჯლდება და არის არაეფექტური. შესაბამისად, გამოდის ისე, რომ მე ვარ კეთილსინდისიერი მესაკუთრე და მეორე მხარეს იმ ფართში ყოფნის საფუძველი არ აქვს. მესაკუთრე კი შეიძლება 4 წელი იყოს ამ მდგომარეობაში, ხარჯოს სასამართლოში დრო და სახსრები და მხოლოდ ამის შემდეგ დაიბრუნოს საკუთრება”. – ამბობს კომპანია MG LAW OFFICE მმართველი პარტნიორი და დამფუძნებელი არჩილ გიორგაძე.