რუსმა სამხედროებმა უკრაინის პრეზიდენტის ვოლოდიმირ ზელენსკის აგარაკი გაძარცვეს კუნძულ ბირიუჩიზე, კურორტ კირილოვკაში. ამის შესახებ ადგილობრივმა მოსახლეობამ „რია-მელიტოპოლს“ განუცხადა.
2 აპრილს რუსმა ოკუპანტებმა სახლიდან ავეჯი გამოიტანეს. როგორც თვითმხილველები ამბობენ, რუსეთის ფედერაციის სამხედროები სახლის ტერიტორიაზე დაახლოებით 5:30 საათზე შევიდნენ. ზელენსკის აგარაკზე ორი ჯავშანტრანსპორტიორი დარჩა, სამი კი სასაზღვრო პუნქტისკენ წავიდა.
რუსებს თან ახლდა აზოვ-სივაშის ეროვნული პარკის დირექტორი ევგენი პოპოვჩუკი. დამპყრობლები სოფელ კირილოვკაშიც მივიდნენ, სადაც მარიუპოლიდან ლტოლვილები ჩავიდნენ.
ადგილობრივი მოსახლეობა, ასევე, ამტკიცებს, რომ რუსებმა ადგილობრივი დასასვენებელი ცენტრების ძარცვა უკვე დაიწყეს.
ბირიუჩი არის ქვიშიანი კუნძული აზოვის ზღვაში, რომლის საერთო ფართობი 7000 ჰექტარზე მეტია.
როგორც ადგილობრივი მედია წერს, ზელენსკის დაჩის ტერიტორიაზე არის საცურაო აუზი და სპორტული მოედანი. იქ მცხოვრებლების თქმით, პრეზიდენტი კუნძულს ოჯახთან ერთად ხშირად სტუმრობდა.
კომენტარები