ჟურნალისტი, ვახო სანაია:
“რასაც რუსეთი დაარქმევს ,,ნეიტრალიტეტს”, სინამდვილეში უკრაინისთვის ეს იქნება ნატო ნატოში გაწევრიანების გარეშე – უკრაინას ეყოლება უსაფრთხოების გარანტორი დიდი სახელმწიფოები. ოღონდ რეალური გარანტორები. ეს იქნება ფაქტობრივად მე-5 მუხლის გავრცელება უკრაინის ტერიტორიაზე მომავალში რუსეთის თავდასხმის შემთხვევაში.
ამ შეთანხმებას თუ მიაღწია უკრაინამ, დიდი წარმატება იქნება.
ასევე უკრაინის დაუბრკოლად სვლა ევროკავშირისკენ.
ომის დასრულების შემდეგ უკრაინა მიიღებს დასავლეთიდან კოლოსალურ დახმარებას.
სხვა საკითხები :
რთული თემაა რუსეთის მიერ ,,აღიარებული” დონეცკი და ლუგანსკი. ვფიქრობ, პუტინს ამ ორის რეგიონის მიერთება სურს ყირიმის ანალოგიით. ეს დიდი პრობლემაა უკრაინისთვის. ასევე მნიშვნელოვანია, რა საზღვრებში მიითვისებს უკრაინის ამ ტერიტორიას.
თუ პუტინი ანექსიის გზით წავიდა და რუს ხალხს დონბასი და ეგრეთ წოდებული ,,ნეიტრალიტეტი” მიართვა გამარჯვების იმიტაციისთვის, რას იზამს ასეთ შემთხვევაში კიევი ? მოაწერს თუ არა ცეცხლის შეწყვეტას ხელს ? ასევე საერთოდ შედგება თუ არა შეთანხმება ? ამ ვითარებაში, ლოგიკურია, პუტინმა ანექსიის გაფორმება დაასწროს და ეს უკრაინა-რუსეთის შეთანხმებამდე გააკეთოს. 9 მაისი არ არის პატარა თარიღი. სავარაუდოდ, ამ თარიღზე აქვს პუტინს სწორება.
შევაჯამოთ. ესე იგი, ამ ვარიანტის შემთხვევაში :
უკრაინა მიიღებს:
- ნატოს ნატოს გარეშე ანუ უსაფრთხოების მყარ გარანტიებს.
- გახსნილ გზას ევროკავშირისკენ
- დასავლეთისგან დიდ ფინანსურ დახმარებას
- ქვეყნის განვითარებისა და აღორძინების უნიკალურ შანსს
რუსეთი მიიღებს :
- დონეცკსა და ლუგანსკს (ჯერჯერობით გაურკვეველ საზღვრებში )
- ყირიმის შემდეგ ტერიტორიულად უფრო გაფართოებულ რუსეთს, რაც უნდა მიჰყიდოს თავის ხალხს გამარჯვებად
3 . ეგრეთ წოდებულ ,,ნეიტრალიტეტს” უკრაინაში სახის შესანარჩუნებლად და გარანტიას, რომ იქ ნატოს ბაზები არ განთავსდება.
- პუტინი ინარჩუნებს ძალაუფლებას
საინტერესოა, შეთანხმების შემთხვევაში რა ბედი ეწევა სანქციებს ? დააბრუნებენ თუ არა რუსეთს საერთაშორისო პოლიტიკაში ?
ამ მოდელის შემთხვევაში ეყოფა თუ არა რუსეთს ძალები საქართველოსთვის ? დონეცკი და ლუგანსკი – აფხაზეთი და ცხინვალის რეგიონი. ნეიტრალიტეტი საქართველოში.
თუ რუსეთი ანალოგიური მოთხოვნებით მოუბრუნდება საქართველოს, კარგად უნდა ავუხსნათ ხალხს – აფხაზეთსა და ცხინვალს ვერასდროს დავთმობთ. უკრაინული ,,ნეიტრალიტეტი” და საქართველოსთვისთვის მოსკოვიდან მოთხოვნილი ნეიტრალიტეტი სხვადახვა რამე იქნება – ჩვენ უსაფრთხოების ისეთი პოტენციური გარანტორები, როგორც უკრაინას გამოუჩნდება, ჰორიზონტზეც არა გვყავს. პარტნიორობის გასაძლიერებლად საქართველოს ხელისუფლება არაფერს აკეთებს, უფრო პირიქით.
რას აკეთებს ამ ვითარებაში ქართული ოცნება – იმდენად ასუსტებს ქვეყანას შიგნითაც და გარეთაც, რომ საბოლოოდ კაპიტულაციას დაგვიდებს მაგიდაზე და გვეტყვის, ხელი უნდა მოვაწეროო. ამას ემსახურება მისი რიტორიკა და ქმედებები, ყველა სხვას კი – ომის პარტიას უწოდებს და ამორალურად აბრალებს ომის მომხრეობას.
ქართული ოცნება მზადაა, უარი თქვას აფხაზეთზე, ცხინვალზე, დასავლურ კურსზე; მზადაა, საქართველო დააბრუნოს რუსეთის ორბიტაზე ოფიციალურად. რეალურად – საქართველოს დამოუკიდებლობის გაუქმებაზე თანახმაა უაზრო კითხვის საფარქვეშ – ,,აბა, ომი გინდათ ? ”
ერთი სიტყვით, ესაა, რა კონტურებიც ახლა ჩანს უკრაინაში და უკრაინის ფონზე. ჯერჯერობით ომი გრძელდება და ის რუსეთისთვის კატასტროფული შედეგების მომტანია. ამიტომ ცდილობს პუტინი ამ ომიდან მისთვის ისეთი შედეგებით გამოსვლას, რაც მოჩვენებითი გამარჯვების სახით უნდა გაყიდოს ქვეყნის შიგნით. პუტინის გეგმები უკრაინაში ჩავარდა, ახლა კი ცდილობს რამე გამოივაჭროს.
რუსეთისთვის ომის გაგრძელება კატასტროფაა. თუ შეთანხმება ვერ მოხდა, უკრაინა ბოლომდე მიაწვა და დასავლეთმა პრინციპულობა შეინარჩუნა/გააძლიერა – პუტინი ვერაფერს გამოივაჭრებს და რუსეთს უფსკრული ელოდება.”
კომენტარები