უკრაინაში მიმდინარე მოვლენებსა და ამ მოვლენების მნიშვნელობაზე ქართული სახელმწიფოს მომავალი განვითარებია საქმეში, სოციალურ ქსელში საუბრობს ჟურნალისტი თეონა გეგელია.
ჟურნალისტი ამბობს, რომ უკრაინელების ბრძოლა დღეს ჩვენთვის „იმაზე მეტი ვიდრე პოლიტიკა და პოლიტიკოსები.“
„არსებობს მარტივი არჩევანი სიკეთეს და ბოროტებას შორის, რომელიც ყოველთვის არსებობდა, მაგრამ ომის ფონზე ბრმებისთვისაც თვალსაჩინო ხდება. ან „ცხოვრობ“ სახელმწიფოში, სადაც არსებობს ხელისუფლების შეცვლის გარანტირებული შესაძლებლობა, გამოხატვის თავისუფლება და სამართლიანი სასამართლო ან „არსებობ“ ქვეყანაში, სადაც ხელისუფლებას ვერ ცვლი, სიტყვაც წართმეული გაქვს და სამართალიც.
ყველაფერზე შეიძლება იკამათო და პირველ რიგში იმაზე, რომ იდეალური სახელმწიფო(ები) არ არსებობს. დღევანდელი დასავლეთი იდეალური კი არა, იდეალურისგან ძალიან შორსაა, მაგრამ სხვა ადგილი ამ სამი სასიცოცხლოდ მნიშვნელოვანი უფლების რეალიზებისთვის უბრალოდ არ არსებობს. ამიტომაა უკრაინელების ბრძოლა დღეს ჩვენთვის იმაზე მეტი ვიდრე პოლიტიკა და პოლიტიკოსები. უკრაინის პრეზიდენტის ვინაობაც კი მეასეხარისხოვანია რიგითი უკრაინელების მოტივაციის ფონზე, არათუ ამ პრეზიდენტის ადმინისტრაციის სადავო ქართველი თანამშრომლების ვინაობა (ვისაც არ ახსოვს, რომ არა დასავლეთი, არავინ იცის აქ 2012 წელს ხელისუფლების ცვლილება მოხდებოდა თუ არა).“- წერს თეონა გეგელია.
მისი თქმით, საზოგადოებისათვის სწორი დასკვნების გაკეთება რატომღაც რთული აღმოჩნდა. ასეთებს თეონა გეგელია დუმილს ურჩევს.
„რთული დროა და გასაგებია, რომ ადამიანებს მთავარი და მეორეხარისხოვანი პრობლემების განსაზღვრა უჭირთ. მაგრამ ბავშვების მკვლელობის ფონზეც ვერ ჩამოყალიბდე – რა არის ნამდვილი ბოროტება, ან ისეთივე მანიაკი ხარ ვინც ამას აკეთებს, ან ხარ მანიაკის სამსახურში. ვინც არცერთია, არც მეორე და უბრალოდ თავი აუდუღდა, მისთვის ალბათ, ყველაზე კარგი გამოსავალი დუმილია, იმაზე ფიქრი, ბოლოს და ბოლოს რა მომავალი უნდა საკუთარი შვილებისთვის – ცხოვრება, თუ მუდმივ შიშსა და სიღატაკეში არსებობა,“- წერს ჟურნალისტი.
კომენტარები