“მერე ის სამოქალაქო ომი მამაშენმა დაიწყო კრემლის დავალებით და ვითომ არ იცი ეს?” – ასე გამოეხმაურა „ლეიბორისტული პარტიის ლიდერი შალვა ნათელაშვილი ირაკლი კობახიძის განცხადებას, სადაც კობახიძემ 1990-იანი წლები და სამოქალაქო ომი გაიხსენა.
ირაკლი კობახიძემ ეს კონკრეტული მაგალითი იმის დასადასტურებლად მოიყვანა, თუ რა შედეგები შეიძლება მოჰყვეს ხელისუფლების მიერ „გაბედული“ და „თამამი“ გადაწყვეტილებების მიღებას.
„ჩვენ გვახსოვს „გაბედული“, „თამამი“ გადაწყვეტილებები 1990-იანი წლების დასაწყისიდან მოყოლებული. თქვენ გახსოვთ, მაგალითად, ისტორია, როგორ არ შევიდა საქართველო დსთ-ში, შემდეგ, როგორ დაიწყო მეორე დღეს სამოქალაქო ომი, ორ წელიწადში როგორ დავკარგეთ აფხაზეთის 80% და ნახევარი ცხინვალის რეგიონი და მერე ისევ, როგორ დავასრულეთ დსთ-ში შესვლით. ეს 3-წლიანი ისტორია არის ძალიან კარგი მაჩვენებელი იმისა, თუ კონკრეტულ შემთხვევაში, რა გადაწყვეტილებებმა, რა შედეგებამდე შეიძლება მიგიყვანოს. ძალიან ბევრი შეცდომა იქნა დაშვებული 1990-იან წლებში, მომდევნო დეკადაში,“- განაცხადა ირაკლი კობახიძემ.
შეგახსენებთ, აღნიშნული განცხადება ირაკლი კობახიძემ გუშინდელ ბრიფინგზე გააკეთა, სადაც „ქართული ოცნების” თავმჯდომარემ, 1990-იანი წლების დასაწყისი საქართველოს ხელისუფლების საქმიანობის შეფასებისას გაიხსენა და აღნიშნა, რომ მოქმედი ხელისუფლება რაციონალური მოქმედებით გამოირჩევა.
კომენტარები